Womusu 27

1Dafidin womu. Yinni Gusunɔwa u ra nɛn swaa yam bururasie, u man faaba mɔ̀. Na ǹ goon bɛrum mɔ. Yinni Gusunɔ u sãawa nɛn kuku yeru. Na ǹ gãanun bɛrum mɔ. 2Nɛn yibɛrɛba bà n man wɔrima bu ka man go, ba ǹ man wasi. Kɔ̃san kowobu bà n man susima bu ka man nɔni sɔ̃, gãanu kun man mɔ̀. Be kpurowa ba koo wɔruku. 3Nɛn yibɛrɛba bà n man sikerena ba man tabu wɔrima, nɛn torora kun karamɔ. Gusunɔwa ko na n naanɛ sãa. 4Gãa teena na Gusunɔ kanamɔ ni nu man nɛni gem gem. Niya, na n wãa ka wi, win wãa yerɔ nɛn wãarun tɔ̃ru kpuro sɔɔ. Kpa n win durom denda kpa na n nùn sãamɔ. 5Domi u koo man bere win wãa yerɔ nɔni swãarun sanam, kpa u ka man da kperu wɔllɔ mi goo kun man naa turi. 6Yen sɔ̃na kon kpĩ n nɛn yibɛrɛba yɛ̃ɛ be ba ka man sikerenɛ. Kon da Yinni Gusunɔn wãa yee dɛɛraru mi, kpa n nùn yãkunu kua, kpa n nùn siara ka womusu. 7Yinni Gusunɔ, na nun soku. A nɛn nɔɔ nɔɔwɔ. A nɛn wɔnwɔndu waawo. A man wurario. 8Wuna a nɛɛ, bu nun sãawɔ. Wee, na nun sãamɔ. 9Na sãawa wunɛn sɔmɔ. A ku man biru kisi. A ku man gira ka mɔru. Wuna a ra man somi. A ku man deri. Gusunɔ nɛn Faaba kowo, a ku man yina. 10Na yɛ̃ ma baa nɛn tundo ka nɛn mɛro bà n man yina, wunɛ Yinni Gusunɔ, kaa man mwa. 11Yinni Gusunɔ, a man wunɛn swaa sɔ̃ɔsio kpa a de n sĩ dee dee ye sɔɔ, domi nɛn yibɛrɛba ba dabi. 12A ku man bɛri yibɛrɛban nɔmaɔ. A ku de bu man kua ye na ǹ kĩ. Domi seeda dio weesugibu ba man seesimɔ, be, be ba dam dɔrebun wasikiranu mɔ̀. 13Na yĩiyɔbu mɔ ma kon Yinnin durom denda, wasobun suunu sɔɔ. 14Yen sɔ̃, a n Yinni Gusunɔ naanɛ sãa. A ku mwia kpana. A de wunɛn tororu ta n sɔ̃ sim sim. A n Yinni Gusunɔ naanɛ sãa.

will be added

X\