Womusu 26

1Dafidin womu. Yinni Gusunɔ, wuna na naanɛ sãa mam mam. Na sĩimɔwa dee dee wunɛn woodaba sɔɔ. A man gem wɛ̃ɛyɔ. 2A nɛn bwisikunu ka nɛn bwɛ̃ra sirio. A man wɛ̃ɛrio kpa a man gia. 3Domi wunɛn kĩra na nɔni girari. Ma na sĩimɔ wunɛn durom sɔɔ. 4Yen sɔ̃na na ku ra ka tɔn kɔ̃sobu sinɛ. Mɛya na ku ra maa ka murafitiba sĩ. 5Na kɔ̃san kowobu tusa. Na ku ra ka bu sinɛ. 6Na ra nɛn nɔma niɛwa n ka sɔ̃ɔsi ma na ǹ taarɛ mɔ. Na ra de n nun sã na n wunɛn yãku yeru sikerenamɔ, 7na n nun siaramɔ, na n wunɛn sɔm maamaakiginun gari kparamɔ. 8Na ra kã n da wunɛn sãa yerɔ domi miya a ra n wãa wunɛn yiikon girima sɔɔ. 9Yinni Gusunɔ, a ku de n gbi ka durumgibu sannu. A ku de n kam ko ka be ba tɔmbun yɛm yarimɔ sannu. 10A ku man siri ka be ba daa kɔ̃sa mɔ̀ sannu. A ku man siri ka be ba ra nɔm biran kɛ̃nu mwɛ sannu. 11Na sĩimɔwa dee dee wunɛn woodaba sɔɔ. Yinni Gusunɔ, a man durom kuo, a man faaba koowo. 12Na yɔ̃wa dim dim swaa gea sɔɔ. Yen sɔ̃na kon nun siara mi wunɛn tɔmba mɛnnɛ.

will be added

X\