Womusu 25

1Dafidin womu. Yinni Gusunɔ, wuna na soku. Wee na yiire na nun kanamɔ. 2Na nun naanɛ sãa. A ku de n sekuru wa. A ku de nɛn yibɛrɛba bu man yɛ̃ɛ. 3Be ba nun naanɛ sãa ba ǹ sekuru wasi, adama be ba ǹ ka nun yɔ̃, ba koo sekuru wa. 4Yinni Gusunɔ, na nun kanamɔ, a man wunɛn swaa sɔ̃ɔsio. A man sɔ̃ɔsio nge mɛ kon sĩ ye sɔɔ. 5Nɛn Faaba kowo, a man kparo gem swaa sɔɔ. A man keu koowo. Domi wuna na naanɛ sãa baadomma. 6Yinni Gusunɔ, na nun kanamɔ, a wunɛn durom ka wunɛn wɔnwɔndu yaayo, ye a man sɔ̃ɔsi yellun di. 7A ku maa yaaya durum ye na kua nɛn aluwaasiru sɔɔ. A ku nɛn mɛm nɔɔbu sariru mɛɛri. A man yaayo wunɛn wɔnwɔndu ka wunɛn tɔn geerun sɔ̃. 8Yinni Gusunɔ, a sãawa tɔn geo. A maa sãawa gemgii. A ra durumgii swaa gea sɔ̃ɔsi. 9A ra be ba tii kawe swaa gea sɔ̃ɔsi, kpa a bu kpara ye sɔɔ. 10Domi be ba wunɛn arukawani nɛni, ma ba wunɛn woodaba swĩi, a bu kĩ, a maa sãa naanɛgii ben mi. 11Yinni, wunɛn yĩsirun sɔ̃, a nɛn durum wɔko domi ya kpã. 12Na yɛ̃ ma wi u nun nasie, wiya a ra swaa sɔ̃ɔsi ye u koo kpe. 13Wiya u ko n wãa bɔri yɛndu sɔɔ. Win bwesera ta koo tem mɛ tubi di. 14Yinni Gusunɔ, wi u nun nasie, wiya a ra wunɛn asiri sɔ̃. Wiya a ra wunɛn arukawanin woodaba giasie. 15Na yɛ̃ ma wuna a ra nɛn naasu yare saa yinan di. Yen sɔ̃na ko na n nun mɛɛra baadomma. 16Yinni Gusunɔ, a nɛn wɔnwɔndu waawo. Wee, ba man deri, na wãa nuku sankiranu sɔɔ. 17A man tu wunɔ. A man yaro nɔni swãarun di. 18A nɛn wahala mɛɛrio. Wee, na wɔnwɔndu soore. A nɛn durum wɔko. 19A mɛɛrio nge mɛ nɛn yibɛrɛba ba dabi, ba man tusa ba kɔ̃rua. 20A man wɔro, a man kɔ̃suo. A ku de n sekuru wa domi na kukua wunɛn mi. 21A man somiɔ na n ka dɛɛre. A man somiɔ na n ka wãa gem sɔɔ. Wuna na naanɛ sãa, kaa man kɔ̃su. 22Gusunɔ, a wunɛn tɔmbu Isireliba yaro ben nɔni swãaru kpuron di.

will be added

X\