Womusu 22

1Dafidin womu ge u wom kowobun wirugii kua. U nɛɛ, 2Gusunɔ, nɛn Yinni, mba n kua a ka man deri. Mban sɔ̃na a ǹ man swaa daki sanam mɛ na nun weeweenu koosimɔ. Mban sɔ̃na a ǹ man faaba kue. 3Mban sɔ̃na a ku ra man wurari sanam mɛ na nun soka sɔ̃ɔ sɔɔ. Mban sɔ̃na a ku ra man wisi sanam mɛ na nun kana wɔ̃kuru. 4Wuna a sere sãa Dɛɛro, a sɔ̃ wunɛn sina kitarɔ. Isireliba ba nun tɔmamɔ. 5Wuna bɛsɛn sikadoba ba naanɛ kua, ma a bu yakia. 6Ba nun somiru kana, ma a bu faaba kua. Ba nun naanɛ kua, ma a bu sekuru yara. 7Adama nɛ, na maa sãawa tɔnu mi? Aawo, na sãawa nge kɔkɔbu. Ma tɔmba man yaakoru mɔ̀, ba man gɛma. 8Be ba man wa kpuro, ba ra n man yɛ̃ɛmɔwa, ba n man nɔɔ swiikinu mɔ̀, ba n wii gimanu koosimɔ, ba n mɔ̀, 9na nɛn tii Gusunɔ nɔmu sɔndia. Mban sɔ̃na u ǹ man faaba kue. Ù n man kĩn na, mban sɔ̃na u ǹ man yakie. 10Adama Yinni Gusunɔ, wuna a man yara nɛn mɛron nukurun di. Wuna a man bwɛ̃ɛ dora wɛ̃ ye na nɛn mɛron bom nɔrumɔ. 11Wuna a man kɔ̃su saa mìn di ba man mara. Wuna a sãa nɛn Yinni saa nɛn mɛron nukurun di. 12A ku ka man tonda, domi nɔni swãara man turuku koosima. Goo maa sari wi u koo man somi. 13Yibɛrɛ dabinu nu man sikerenɛ nge naa kinɛ ni nu gɔbu. Ba man kooro bure nge Basanin kɛtɛ gɔbi. 14Ba man kukirisimɔ nge gbee sunɔ ge ga yaa kasu. 15Nɛn dam mu doona nge nim mɛ mu yari yani sɛɛri sɔɔ. Nɛn kukunun gbin gbinka kpuro sɔsikiana. Nɛn mwia doona nge gum mɛ mu yanda. 16Nɛn gɔ̃ru ga gbera nge sɔndu, ma nɛn yara ya nɛn daro mani. Na kpĩ yanim sɔɔ nge goru. 17Domi yibɛrɛ dabina nu man kooro bure baama nge gbeeku bɔ̃nu. Ba nɛn nɔma ka nɛn naasu yabura. 18Na woore sere nɛn kukunu kpuro nu sɔ̃ɔsire. Tɔmbu ba man mɛɛra ba nɔɔ yaare. 19Ba nɛn yãnu bɔnu mɔ̀ ben tii tiinɛ sɔɔ. Ma ba nɛn yabe bakaru tɛtɛ toosimɔ. 20Wunɛ Yinni Gusunɔ, wuna a sãa nɛn dam. A kun ka man tonde mɛ. A na fuuku a man faaba ko. 21A man wɔro yibɛrɛban takobin di. Ba dam mɔ nge gbeeku bɔ̃nu. A nɛn wãaru wɔro ben nɔman di. 22Ba man wɔrimɔ nge gbee sinansu. Ba man kooro buremɔ nge kɛtɛ gbeekinu. 23Kon nɛgibu kpuro wunɛn gari sɔ̃. Kon nun siara mi ba mɛnnɛ. 24Yakɔbun bweseru, bɛɛ be i Yinni Gusunɔ nasie, i nùn siaro. Bɛɛ Isireliba, Yakɔbun bweseru, i nùn tɔmɔ. Bɛɛ Isireliba, i nùn sãawɔ. 25Domi u ku ra nɔni swãarugiin wahala yaakoru ko. U ku ra maa ye atafiiru ko. U ku ra nùn biru kisi. U ra win sokuru wurewa. 26Kon nun siara sanam mɛ be ba nun nasie ba mɛnnɛ. Kon nɛn nɔɔ mwɛɛnu yibia ben baawuren wuswaaɔ. 27Sãarobu ba koo di bu debu. Be ba Yinni Gusunɔ kasu, bera ba koo nùn siara. Kpa ben hunde yu dakaa da. 28Handunian goonu nnɛn tɔmbu ba koo Yinni Gusunɔ yaaya kpa bu gɔsirama win mi. Bwesenu kpuro nu koo yiira win wuswaaɔ. 29Domi Yinni Gusunɔwa u sãa sunɔ. U bandu dii bwesenu kpuron wɔllɔ. 30Baa handunian damgibu ba koo nùn kpuna. Tɔmbu kpurowa ba koo nùn yiira. 31- 32Be ba koo marura, ba koo bu Yinni Gusunɔn gari sɔ̃. Be ba ǹ gina nɛ dunia sɔɔ, ba koo win gari kpara, kpa bu ben bibu sɔ̃ ye u win tɔmbu kua, kpa be kpuro bu nùn sã.

will be added

X\