Womusu 21

1Womu ge wom kowobun wirugii u kua Dafidin sɔ̃. 2Yinni Gusunɔ, sina boko u nuku dobu mɔ wunɛn dam sɔ̃. U ra yɛ̃ɛri wunɛn somirun sɔ̃. 3Domi a nùn wɛ̃ ye win gɔ̃ru ga kĩ. A ǹ nùn yinari ye u nun bikia. 4Wee, a ka nùn doma geeru naawa. A nùn furɔ wuraguu dokea a kua sina boko. 5U nun bikia a win wãaru dakaa daasia, ma a tu dakaa daasia n ka tɛ. 6Wunɛn somirun saabuwa win bɛɛrɛ ya ka kpɛ̃a. Wunɛn faaban saabuwa u ka girima baka wa. 7Wunɛn domara ko n wãa ka wi sere ka baadommaɔ. A ra n wãa ka wi baadomma, kpa u n nuku dobu mɔ. 8Yinni Wɔrukoo, sina boko u nun naanɛ sãa. Wunɛn durom saabu a ǹ derimɔ u sokura. 9- 10Sina boko, dɔma te kaa tii sɔ̃ɔsi, kaa wunɛn yibɛrɛba nɔma turi, kaa be ba nun tusa nɔma turi, kaa bu doke dɔ̃ɔ bwee bakaru sɔɔ. Yinni Gusunɔn mɔru ya sãawa nge dɔ̃ɔ boko. Dɔ̃ɔ wi, u koo bu mwa. 11Kaa de ben bibu bu gbi. Kaa de ben bweseru tu nɔru ko handunia yeni sɔɔ. 12Bà n nɔɔ tia kua bu ka nun kɔ̃sa kua, ya ǹ koorɔ. 13A wunɛn tɛndu bɛrio a bu twee. Ba koo nun biru kisi. 14Yinni Gusunɔ, a seewo. Sa ko nun womu kua wunɛn dam sɔ̃. Sa ko nun tɔma wunɛn yiikon sɔ̃. Yinni Gusunɔ, a seewo.

will be added

X\