Womusu 20

1Kana te wom kowobun wirugii u kua Dafidin sɔ̃. 2Gusunɔ, Yakɔbun Yinni, a sina boko swaa dakio sanam mɛ u kanaru mɔ̀. A nùn kɔ̃suo sanam mɛ u wãa nɔni swãaru sɔɔ. 3Yinni Gusunɔ, wunɛ wi a wãa wunɛn sãa yee dɛɛrarɔ te ta wãa Siɔniɔ, a sina boko somima, kpa a n yɔ̃ win biruɔ. 4A win kɛ̃nu kpuro yaayo, kpa a win yãkunu kpuro mwa. 5A nùn wɛ̃ɛyɔ ye win gɔ̃ru ga kĩ kpuro, kpa a de win himba kpuro yu koora. 6A de ye u nun bikia kpuro yu koora, kpa bɛsɛ kpuro su yɛ̃ɛri sina bokon nasaran sɔ̃, kpa su wunɛn yĩsiru wɔlle sua. 7Tɛ̃, na yɛ̃ ma wuna a sina boko gɔsa, a ra maa nùn somi. Wuna a ra win kanaru nɔ saa wɔllun di, kpa a nùn nasara wɛ̃ ka wunɛn dam bakam. 8Gaba ben tabu kɛkɛba ka ben dumi naanɛ sãa, adama bɛsɛ, wunɛ Yinni Gusunɔwa sa naanɛ sãa. 9A de tɔn be, bu dam bia bu wɔruku, adama a sun dam sosio bɛsɛ, su ka yɔ̃ra dim dim. 10Yinni Gusunɔ, a bɛsɛn nɔɔ nɔɔwɔ sanam mɛ sa nun soku. A sina boko somiɔ.

will be added

X\