Womusu 2

1- 2Yinni Gusunɔ u goo gɔsa u bandu wɛ̃. Mban sɔ̃na sinambu ba nùn seesimɔ. Mban sɔ̃na tem yɛ̃robu ba nùn seesimɔ. Mban sɔ̃na tem wirugibu ba tabun sɔɔru mɔ̀. Mban sɔ̃na bwesenu nu arukawani bɔkumɔ. Mban sɔ̃na tɔmba nɔɔ tia mɔ̀ ba mɔ̀, 3su ben dam bua, su tii yakia ben yorun di. 4- 6Ba n yɛ̃ ma kama mi, domi Gusunɔ u bu yɛ̃ɛmɔ. Yinni u sɔ̃ wɔllɔ u bu yaakoru mɔ̀. U sunɔ wi u gɔsa swĩi kɔ win guurɔ te ba mɔ̀ Siɔni. Yen sɔ̃, i n tii sɛ, kpa u ku bɛɛ sɛɛyasia ka mɔru, kpa i nanda win mɔru bakan sɔ̃. 7Sunɔ wi, u nɛɛ, kon kpara ye Yinni Gusunɔ u man sɔ̃ɔwa. U nɛɛ, gisɔ na kua win bii. Gisɔ u kua nɛn tundo. 8U man sɔ̃ɔwa u nɛɛ, nà n nùn bwesenu kpuro kana, u koo man nu wɛ̃. Nà n nùn handunian goonu nnɛ kana, u koo man ye wɛ̃. 9U maa man sɔ̃ɔwa u nɛɛ, kon kpĩ n bu kpara nge wi u kparamɔ ka sii bokuru, kon kpĩ n bu kɔsuku nge weke te ba mɔma. 10Tɛ̃, bɛɛ sinambu, bɛɛ be i tem kpare, i kirɔ yeni swaa dakio. Bɛɛ sinambu, bɛɛ be i tem kpare, i yɛ̃ru kasuo. 11I Yinni Gusunɔ sãawɔ ka bɛɛrɛ. I Yinni Gusunɔ wiru kpĩiyɔ ka nasiaru, 12kpa u ku raa mɔru ko subaru sɔɔ. Domi win mɔru yà n seewa, u koo de i kam ko. Adama doo nɔɔrugiba be ba nùn naanɛ sãa kpuro.

will be added

X\