Womusu 19

1Dafidin womu ge u wom kowobun wirugii kua. Ge wee. 2Wɔllu ka kperi yi Gusunɔn yiiko sɔ̃ɔsimɔ. Sɔ̃ɔ ka suru ba Gusunɔn bɛɛrɛ sɔ̃ɔsimɔ. Ka win nɔma u saaba yi yi. 3Tɔ̃ru baatere ta ten seeda dimɔ. Wɔ̃kuru baatere ta ten areru dimɔ. 4Adama n ǹ ka nɔɔ gagu, n ǹ ka gari gɛɛ, n ǹ ka barum gam. 5Ka mɛ, ba yiiko yen seeda nɔɔmɔ handunia kpuro sɔɔ. Ba ye mɛɛra handunian goonu nnɛ sɔɔ. A sɔ̃ɔ mɛɛrio. Wɔllu miya Gusunɔ u nùn wãa yeru kua. 6Ù n yara u ra n sãawa nge kurɔ kpaon durɔ. Ù n sĩimɔ u ra n sãawa nge tabu durɔ. 7U ra yariwa wɔllun bee tia, kpa u du bera giɔ. Ù n sĩimɔ, gãanu sari ni nu koo win yam susuru suuri. 8Yinni Gusunɔn gari yi yiba. Yi ra tɔnu wãaru ka dam wɛ̃. Yinni Gusunɔn nɔɔn gari yi naanɛ mɔ. Yi ra yɛ̃ru sarirugii bwisi kɛ̃. 9Yinni Gusunɔn gere ya dɛnde. Ya ra tɔnu nuku dobu wɛ̃. Yinni Gusunɔn sɔ̃ɔsiru ta dɛɛre. Ta ra tɔnu yam waasie. 10Yinni Gusunɔn sãaru ta sãa gem. Ta ko n wãawa sere ka baadommaɔ. Ye Yinni Gusunɔ u yi, ya sãawa dee dee, ya ra tɔmbu kpuro siriwa. 11Domi win gari yi wura gea kere. Win gere ya tim gɔm dobu kere. 12Nà n win gari yi swĩi, yi ra man kirɔ ko. Nà n win woodaba mɛm nɔɔwa, na ra yen arufaani wa. 13Ka yen de kpuro tɔnu koo kpĩ u win toranu kpuro tubu? Yinni Gusunɔ, a man dɛɛrasio nɛn tora ni na ǹ tuban di. 14A ku maa de n durum ko ka degangam. A ku de yu man dɔɔrɛ ko, kpa na n durum bakan taarɛ mɔ. Adama a de na n dɛɛre. 15Yinni Gusunɔ, a de a n sãa nɛn kuku yeru. Yinni Gusunɔ, a man faaba koowo durum kpuron di. A de nɛn gari yi nun wɛ̃re. A de nɛn bwisikunu nu nun wɛ̃re.

will be added

X\