Womusu 17

1Dafidin kanaru. Yinni Gusunɔ, a nɛn weeweenu nɔɔwɔ, na kĩwa a man gem wɛ̃. Yinni Gusunɔ, a swaa tem kpĩiyɔ a nɔ, wunɛn somira na kĩ. A nɛn kanaru nɔɔwɔ, nɛn gɔ̃run diya ta wee. 2A man sirio, a yɛ̃ ma na gem mɔ. 3Wɔ̃kuru, a na nɛn mi, a wɛ̃ɛra ye na bwisikumɔ, a wɛ̃ɛra ye na gerumɔ, adama a ǹ toraru garu wa. 4A wa ma nɛn daa ya ǹ tia ka gabugia. Na wunɛn gari mɛm nɔɔwa. Na ǹ tɔn kɔ̃sobun yira swĩi. 5Na yɔ̃rawa dim dim wunɛn swaa sɔɔ. Na ǹ gɛrare yen min di. 6Tɛ̃, wuna na soku, Yinni Gusunɔ. A man wisio. A nɛn gari nɔɔwɔ. 7A man wunɛn durom bakam sɔ̃ɔsio, domi a ra be ba nun naanɛ sãa wɔre ben yibɛrɛban nɔman di. 8A nɛn laakari koowo nge mɛ tɔnu u ra n win nɔnin laakari mɔ. A man beruo nge mɛ gua ya ra yen binu bere yen kasa sɔɔ. 9Domi tɔn kɔ̃soba man nɔni sɔ̃ɔmɔ, yibɛrɛba ba man sikerenɛ, ba kĩ bu man go. 10Ba nuki sosu ba ǹ wɔnwɔndu mɔ. Ba gari mɔ̀ ka tii suabu. 11- 12Be wee ba sãa nge gbee sunɔ ge ga yaa mara gu kasuku. Ba nɛn yira swĩi. Ba man naamwɛ ba kooro bure, ba man nɔni girari bu ka man gaba bu sura. 13Yinni Gusunɔ, a seewo a bu wɔri, a ben dam buo. A man wɔro ben nɔman di. A bu goowo ka wunɛn takobi. 14A ben wãarun dɛ̃ɛbu kawo. A de bu ben daa kɔ̃sa kpuron are wa, kpa yi n bu wãasi sere ka ben bibun bibɔ. 15Adama nɛ, nà n seewa, kon wunɛn wuswaa wa yèn sɔ̃ na dɛɛre, kpa na n nuku dobu yiba.

will be added

X\