1 I Yinni Gusunɔ siaro. I Yinni Gusunɔ siaro saa wɔllun di. I nùn siaro saa wɔllun sɔɔ sɔɔn di. 2 Bɛɛ win gɔradoba kpuro, i nùn siaro. Bɛɛ win tabu kowobu kpuro, i nùn siaro. 3 Sɔ̃ɔ ka suru, i nùn siaro. Bɛɛ kperi kpuro, bɛɛ be i ballimɔ, i nùn siaro. 4 Bɛɛ be i wãa wɔllun sɔɔ sɔɔwɔ, i nùn siaro. Bɛɛ nim mɛ mu wãa wɔllɔ, i nùn siaro. 5 U wooda wɛ̃, ye kpuro ya koora. Ye kpuro yu nùn siaro. 6 U ye tãsisia sere ka baadommaɔ. U koo wooda yi, win tii kun maa ye saramɔ. 7 Saa tem sɔɔn di, i Yinni Gusunɔ siaro. Bɛɛ nim wɔ̃ku ka nim bwee bakanu ka yɛɛ nanumgii yi yi wãa sɔɔ, i Yinni Gusunɔ siaro. 8 Dɔ̃ɔ ka guru kpenu ka guri baka ka bukɔ ka woo bɔkɔ, bɛɛ be i win woodaba mɛm nɔɔwammɛ, i Yinni Gusunɔ siaro. 9 Bɛɛ guunu ka gungunu ka dãa ye ya ra ma ka sɛduruba, i Yinni Gusunɔ siaro. 10 Gbeeku yɛɛ ka yaa sabenu kpuro ka yɛɛ yi yi kabirimɔ ka gunɔsu, i Yinni Gusunɔ siaro. 11 Handunian sinambu ka bwesenu kpuro ka sina bibu ka handunian siri kowobu kpuro, i Yinni Gusunɔ siaro. 12 Aluwaasiba ka wɔndiaba, tɔkɔnu ka bibu, 13 bɛɛ kpuro, i Yinni Gusunɔn yĩsiru bɛɛrɛ wɛ̃ɛyɔ. Win yĩsira kpã. Win girima ya wɔllu ka tem sare. 14 U win tɔmbu Isireliba be, be ba nun naanɛ sãa ba wãa win bɔkuɔ dam wesia ma n kua bɛɛrɛ baka. Yen sɔ̃, i Yinni Gusunɔ siaro.
