Womusu 147

1I Yinni Gusunɔ siaro. Domi n wã bu Gusunɔ bɛsɛn Yinni siara. N maa wã bu nùn tɔma. 2Yinni Gusunɔ u Yerusalɛmu seeyamɔ. U Yerusalɛmugii be ba raa yoru mwɛɛra mɛnnamɔ. 3U be ba nuki sankire nukuru yɛmiasiamɔ. U ben mɛɛran bosu bɔkumɔ. 4U kperi garimɔ ma u yin baayere yĩsiru kɛ̃mɔ. 5Bɛsɛn Yinni u kpã, u maa dam mɔ. Win bwisi kun nɔru mɔ. 6Yinni Gusunɔ u ra wɔnwɔndobu nɔɔri. Kpa u tɔn kɔ̃sobu sura sere temɔ. 7I Yinni Gusunɔ siarabun womusu kuo. I Gusunɔ bɛsɛn Yinni siaro ka mɔrɔku. 8U ra de guru wiru tu wɔllu wukiri, kpa u gura sɔɔru kua yu ka nɛ tem sɔɔ, kpa u yakasu kpiisia guunu wɔllɔ. 9Wiya u ra yaa sabenu dĩanu wɛ̃, kpa u gunɔ binu dĩanu wɛ̃ sanam mɛ nu kuuki mɔ̀. 10Win naanɛ kun wãa dumin dam sɔɔ. Win yĩiyɔbu kun maa wãa tɔnun dukan dam sɔɔ. 11Be ba nùn nasie ka be ba win durom yĩiyɔ, beya u kĩ. 12Yerusalɛmu, a Yinni Gusunɔ siaro. Siɔni, a Gusunɔ wunɛn Yinni bɛɛrɛ wɛ̃ɛyɔ. 13Domi wiya u ra wunɛn kɔnnɔn gambon sɛ̃retii dam sire, kpa u wunɛn tɔmbu domaru kua. 14U ra de bɔri yɛndu ta n wãa wunɛn temɔ. Kpa u de alikama ya n yiba wunɛ sɔɔ. 15U ra win woodaba nɔɔsie handunia sɔɔ. Win gari yi ra duka dewa fuuku fuuku. 16U ra de nim kperugim mu nɛ, kpa mu n buriri nge yãa sansu. U ra de guru kpenu nu nɛ kpa nu n sãa nge torom. 17U ra n guru kpee ni kasi mɔ̀wa tia tia. Wara koo kpĩ u yɔ̃ra u yen wooru ma. 18Ù n gari gerua, nim kperugim mɛ, mu ra yandewa. Ù n maa dera woo ga mu swee, mu ra kokuwa mu doona. 19U win gari ka win woodaba ka win gere Yakɔbu wi ba mɔ̀ Isireli sɔ̃ɔwa. 20U ǹ bweseru garu kue mɛ. Ten garu ta ǹ maa win woodaba yɛ̃. Yen sɔ̃, i Yinni Gusunɔ siaro.

will be added

X\