Womusu 146

1I Yinni Gusunɔ siaro. Nɛn bwɛ̃ra, a Yinni Gusunɔ siaro. 2Kon wunɛ Yinni Gusunɔ siara nɛn wãarun tɔ̃nu kpuro sɔɔ. Kon wunɛ Gusunɔ nɛn Yinni womu kua nɛn wãarun tɔ̃nu kpuro sɔɔ. 3I ku bɛɛn naanɛ doke sinambu sɔɔ, ba sãawa tɔmbu, ba ǹ kpɛ̃ bu bɛɛ faaba ko. 4Ben wɛ̃siaru ta ra doonɛwa kpa bu wura bu ko tem. Yen tɔ̃ɔ te, ben himba kpuro ya kam kuawa mi. 5Doo nɔɔrugiiwa wìn yĩiyɔbu wãa wunɛ Gusunɔ Yakɔbun Yinni sɔɔ. Doo nɔɔrugiiwa wi u win naanɛ doke Gusunɔ win Yinni sɔɔ. 6Wiya u wɔllu ka tem kua ka nim wɔ̃ku ka ye ya wãa ye kpuro sɔɔ. U sãawa gemgii sere ka baadommaɔ. 7U ra be ba dam dɔremɔ ben gem wɛ̃. Kpa u be ba gɔ̃ɔru soore dĩanu wɛ̃. Yinni Gusunɔ u ra yobu yakie. 8U ra wɔ̃kobu nɔni wukie. U ra be ba taare seeye. U ra gemgibu kã. 9U ra sɔbu kɔ̃su. U ra maa gɔminibu ka gobekuba nɔɔri. Kpa u tɔn kɔ̃sobun himba kam koosia. 10Yinni Gusunɔ, u ko n bandu diiwa sere ka baadommaɔ. Gusunɔ Siɔnin Yinni, u ko n wãawa sere ka baadommaɔ. Yen sɔ̃, i Yinni Gusunɔ siaro.

will be added

X\