Womusu 145

1Womu ge Dafidi u kua u ka Gusunɔ siara. Ge wee. Gusunɔ nɛn sina boko, kon nun wɔlle sua. Kon wunɛn yĩsiru tɔma sere ka baadommaɔ. 2Tɔ̃ɔ baatere kon nun siara. Mɛya kon wunɛn yĩsiru tɔma sere ka baadommaɔ. 3Yinni Gusunɔ, a kpã. Wuna n weenɛ bu siara. Wunɛn kpãaru ta ǹ nɔru mɔ. 4Saa baayeren tɔmbu bu wunɛn sɔma siaro. 5Kon wunɛn yiikon giriman kpãaru gere. Kpa n wunɛn sɔm maamaakiginun gari kpara ka womu. 6Ba koo wunɛn dam bakam gari gere, kpa nɛ, n maa wunɛn kpãarun gari kpara. 7Ba koo wunɛn tɔn geerun kpãaru yaaya kpa bu taki ko wunɛn gem sɔ̃. 8Yinni Gusunɔ, a wɔnwɔndu mɔ, a ra maa tɔmbu durom kue. A ku ra mɔru se fuuku. Wunɛn tɔn geera kpã. 9Yinni Gusunɔ, a tɔmbu kpuro kĩ. Wunɛn wɔnwɔndu ta ra sɔ̃ɔsirewa wunɛn taka koora kpuro sɔɔ. 10Yinni Gusunɔ, wunɛn taka koora kpuro ya koo nun bɛɛrɛ wɛ̃, kpa be ba sãa wunɛgibu bu nun siara. 11Ba koo wunɛn bandun bɛɛrɛn gari gere, kpa bu wunɛn dam gari kpara 12bu ka wunɛn sɔm maamaakiginu tɔmbu sɔ̃ɔsi ka sere wunɛn bandun yiikon girima. 13Wunɛn bandu ta ko n wãawa sere ka baadommaɔ. Mɛya kaa n tu dii sere ka baadommaɔ. Yinni Gusunɔ u ra win nɔɔ mwɛɛnu yibie. Ye u mɔ̀ kpuro sɔɔ, u ra win tɔn geeru sɔ̃ɔsi. 14Yinni Gusunɔ, a ra tɔn be ba wɔrumaa dɔɔ gabe, kpa a be ba dam dwiiya tãsisia. 15Tɔmbu kpurowa ba mɛɛra wunɛn mi gia ka yĩiyɔbu, domi wuna a ra bu dĩanu wɛ̃ nin saa sɔɔ. 16A ra wunɛn nɔma dɛmiɛ kpa a hunde koni baayere wɛ̃ yèn bukata ya mɔ. 17Yinni Gusunɔ, a sãawa gemgii wunɛn swɛɛ kpuro sɔɔ. Mɛya a ra maa wunɛn wɔnwɔndu sɔ̃ɔsi sɔma ye a mɔ̀ kpuro sɔɔ. 18Yinni Gusunɔ, be ba nun sokumɔ ka gɔ̃ru dɛɛrɔ, ben bɔkuɔra a ra n wãa. 19A ra be ba nun nasie kĩru yibie kpa a ben wuri nɔ a bu faaba ko. 20A ra be ba nun kĩ kɔ̃su kpa a tɔn kɔ̃sobu kam koosia. 21Kon wunɛ Yinni Gusunɔ tɔma kpa tɔmbu kpuro bu wunɛn yĩsi dɛɛraru bɛɛrɛ wɛ̃ sere ka baadommaɔ.

will be added

X\