Womusu 144

1Womu ge Dafidi u kua. Ge wee. Yinni Gusunɔ, na nun siara wunɛ wi a sãa nge nɛn kpee baa. Wuna a ra man tabu sɔ̃ɔsi. 2Wuna a ra man durom kue kpa a man kɔ̃su. Wuna a sãa nɛn kuku yee damgiru ka nɛn faaba kowo. Wuna a sãa nɛn tɛrɛru te ta ra man ganɛ. Wuna a ra de bwesenu nu n man wiru kpĩiyɛ. 3Yinni Gusunɔ, wara ra n tɔnu a n sere ka win bwisikunu mɔ̀. Wara ra n tɔnu a n sere ka win weeweenu mɔ̀. 4Tɔnu u sãawa nge woo. Win wãarun tɔ̃nu nu sãawa nge saaru te ta ra doonɛ. 5Yinni Gusunɔ, a de wɔllu tu tem dɛbɛ dɛbɛ ko kpa a sarama. A guunu babo kpa dɔ̃ɔ u yari ni sɔɔn di. 6A de guru maakinu nu sɔ̃ɔsira, kpa a nɛn yibɛrɛba yarinasia. A bu sɛ̃ɛnu tweeyo kpa a de bu yarina. 7A wunɛn nɔmu dɛmiama wɔllun di. A man wɔro kpa a man faaba ko nim bakam ka tɔn tukobun min di 8be ba ra n gari kam yaramɔ ben nɔsun di, kpa ba n ben nɔm geu yiiye bu ka nɔɔ mwɛɛ weesuginu ko. 9Yinni Gusunɔ, kon nun wom kpɔɔ kua. Kon nun womu kua ka mɔrɔku sɛrum wɔkuruguu, 10wunɛ wi a ra sinambu faaba ko, kpa a nɛ, Dafidi wunɛn sɔm kowo yara takobi gɔɔgian di. 11Yinni Gusunɔ, a man wɔro, kpa a man faaba ko tɔn tukobun nɔman di, be ba ra n gari kam yaramɔ ben nɔsun di, kpa ba n ben nɔm geu yiiye bu ka nɔɔ mwɛɛ weesuginu ko. 12A de bɛsɛn bii aluwaasiba bu ko nge dãa ni nu kpia dee dee nin piiburun di, kpa bɛsɛn bii wɔndiaba bu maa ko kurɔ burabu nge gbere be ba dãka ba sãa sina kpaarun buraru. 13A de bɛsɛn biranu nu dĩa bwese bweseka yibu, kpa bɛsɛn yaa sabenu nu dabia nu ko suba nɔrɔm nɔrɔm ka nɔrɔm nɔrɔm suba wɔku wɔkubu bɛsɛn gberu kpaanɛɔ. 14A de bɛsɛn kɛtɛba bu kuura. A ku de goo u sun wɔri kpa u sun yoru mwɛɛri u ka doona. A ku maa de nuku sankiranun wuri yi nɔɔra bɛsɛn swɛɛ sɔɔ. 15Doo nɔɔrugira bwese te ta sãa nge mɛ. Doo nɔɔrugira bwese te ta Gusunɔ mɔ Yinni.

will be added

X\