1 Womu ge Dafidi u wom kowobun wirugii kua. Ge wee. 2 Yinni Gusunɔ, a man wɔro tɔn kɔ̃sobun nɔman di. A man gbaro gbanagibun nɔman di. 3 Domi kɔ̃sa ba ra n bwisikumɔ ben gɔ̃ruɔ. Kpa ba n sɔɔru kpeere baadomma bu ka tabu ko. 4 Ba ra ben yara derewa nge waa. Kpa ben nɔɔ ga n dɛ̃ɛ mɔ nge surɔkɔru. 5 Yinni Gusunɔ, a man tɔn kɔ̃so gbaro. A man gbanagibu giro be ba kasu bu man sura. 6 Wee tii suobu ba man yina bɛriammɛ. Ba man taa yinuammɛ swaa sɔɔ. Ma ba man yɔɔru bwɛ̃ɛyɛ. 7 Adama na nɛɛ, Gusunɔ, wuna a sãa nɛn Yinni. A swaa tem kpĩiyɔ a nɛn kanaru nɔ. 8 Yinni Gusunɔ, a sãawa gbãraru tèn mi na ra kuke n ka faaba wa. A ra nɛn wiru bere tabun saa sɔɔ. 9 A ku de tɔn kɔ̃son kĩru tu koora. A ku de ye u nia sãa yu koora, kpa u ku raa tii sua. 10 Be ba man kooro buremɔ a de ben toranu nu wɔri ben wiru wɔllɔ. 11 A bu dɔ̃ɔ wisio kpa a de bu wɔri wɔru bɔkɔ sɔɔ gèn min di ba ǹ maa kpɛ̃ bu yari. 12 Wi u weesu mɔ̀ u ǹ tãsimɔ tem mɛ sɔɔ. Kɔ̃sa ya ko n maa gbanagii swĩiwa sere u ka kam ko. 13 Na yɛ̃ ma Yinni Gusunɔ u ra wɔnwɔndo siriewa dee dee. Kpa u maa sãaro nùn win gem wɛ̃. 14 Geema, gemgibu ba koo nun tɔma kpa ba n wãa wunɛn wuswaaɔ.
