Womusu 139

1Dafidin womu ge u wom kowobun wirugii kua. U nɛɛ, Yinni Gusunɔ, a man wɛ̃ɛra, a maa man gia. 2A nɛn sindu ka nɛn seebu yɛ̃. A nɛn bwisikunu tuba sarun di. 3A nɛn sanum ka nɛn kpindu yɛ̃. A maa nɛn swɛɛ kpuro yɛ̃. 4N sere nɔɔ wukia, a nɛn gere kpuro yɛ̃ kɔ Yinni Gusunɔ. 5A ka man wãa biru ka wuswaa, ma a man wunɛn nɔmu sɔndi. 6Yɛ̃ɛ ten bweseru ta man sãawɛ maamaaki baka. Ta kpã, na ǹ kpɛ̃ n tu tubu. 7Ma gia kon wunɛn Hunde kisirari n da. Nge ma gia kon duka we a kun ka man wa. 8Nà n yɔɔwa sere wɔllɔ, a wãa mi. Nà n da gɔriɔ, a maa wãa mi. 9Nà n da sɔ̃ɔ yari yerɔ ǹ kun mɛ sɔ̃ɔ duu yerɔ nim wɔ̃kun goorɔ, 10min tii, wunɛn nɔmuwa ga koo man kpara, kpa wunɛn nɔm geu gu man nɛnɛ. 11Nà n nɛɛ, yam wɔ̃kura koo man bere, yam da bururewa mi na wãa. 12Baa yam wɔ̃kuru ta ǹ tĩri wunɛn mi. Wɔ̃kuru ta buririwa nge sɔ̃ɔ sɔɔ. Yam wɔ̃kuru ta ballimɔwa nge yam bururam. 13Wuna a nɛn wasin doo dooka mɔma. Wuna a man swɛɛna nɛn mɛron nukurɔ. 14Na nun siara yèn sɔ̃ a man taka kua ka wunɛn dam maamaakigim. Wunɛn nɔman sɔma kun gere mɔ. Yeniwa na yɛ̃ sãa sãa nɛn gɔ̃ruɔ. 15Sanam mɛ ba man mɔma asiri sɔɔ, ma ba man swɛɛna nɛn mɛron nukurɔ, nɛn wasi kun nun berue. 16A man wa saa ba nɛn nukuru dumɔn di. Wunɛn tireru sɔɔra ba nɛn wãarun tɔ̃nun geeru yorua na sere nu dibu torua. 17Gusunɔ, wunɛn bwisikunu nu duku. Nin dabira banda. 18Nà n nu garimɔ, nu yani sɛɛri dabiru kere. Nà n maa dom seewa, na ra n wãa ka wunɛ. 19Gusunɔ, a de tɔn kɔ̃sobu bu gbi, kpa tɔn gowobu ba n ka man tonde. 20Be, be ba sãa wunɛn yibɛrɛba, ba nun gari kɔ̃si manimɔ. Wunɛn yĩsira ba ka weesu mɔ̀. 21Yinni Gusunɔ, be ba nun tusa ka be ba ra nun seesi, na ǹ kon bu tusi? 22Na bu tusa too too, na bu garisi nɛn yibɛrɛba. 23Gusunɔ, a man wɛ̃ɛrio kpa a nɛn gɔ̃ru gia. A nɛn laakari mɛɛrio kpa a nɛn bwisikunu tubu. 24A mɛɛrio a wa nà n wãa swaa kɔ̃sa sɔɔ, kpa a ka man da wãaru te ta ku ra kpen swaa sɔɔ.

will be added

X\