Womusu 136

1I Yinni Gusunɔ siaro domi u sãa tɔn geo. Win wɔnwɔndu ta ku ra kpe. 2I Gusunɔ siaro, u bũnu kpuro kere. Win wɔnwɔndu ta ku ra kpe. 3I yinnibun Yinni siaro. Win wɔnwɔndu ta ku ra kpe. 4Wi turowa u ra sɔm maamaakigii bakanu ko. Win wɔnwɔndu ta ku ra kpe. 5Wiya u wɔllu ka tem taka kua ka win bwisi. Win wɔnwɔndu ta ku ra kpe. 6- 9U tem tɛria nim wɔllɔ, ma u sɔ̃ɔ ka suru kua. U sɔ̃ɔ kuawa u ka yam bururasia sɔ̃ɔ sɔɔ, ma u suru ka kperi kua ye kpuro yu ka yam bururasia wɔ̃kuru. Win wɔnwɔndu ta ku ra kpe. 10- 11Wiya u Egibitigibun bii gbiikobu go. Ma u Isireliba yara Egibitigii ben suunu sɔɔn di. Win wɔnwɔndu ta ku ra kpe. 12- 15Ka win dama u ka nim wɔ̃ku ge ba mɔ̀ Naa yari burana yiru, ma u dera Isireliba ba tɔbura gen suunu sɔɔn di. Ma u Egibitin sina boko ka win tabu kowobu sure nim wɔ̃ku ge sɔɔ. Win wɔnwɔndu ta ku ra kpe. 16Wiya u win tɔmbu kpara gbaburɔ. Win wɔnwɔndu ta ku ra kpe. 17- 20Wiya u sinambu go be ba dam mɔ. Beya, Sihoni Amɔreban sunɔ ka Ogu Basanin sunɔ. Win wɔnwɔndu ta ku ra kpe. 21- 22Wiya u tɔn ben tem win sɔm kowobu Isireliba wɛ̃ ba tubi di. Win wɔnwɔndu ta ku ra kpe. 23- 24Wiya u sun yaaya sanam mɛ sa wãa sekuru sɔɔ. Ma u sun wɔra be ba sun dam dɔremɔn nɔman di. Win wɔnwɔndu ta ku ra kpe. 25Wiya u ra hunde koni baayere dĩanu wɛ̃. Win wɔnwɔndu ta ku ra kpe. 26I Wɔrukoo siaro. Win wɔnwɔndu ta ku ra kpe.

will be added

X\