Womusu 132

1Sãa daarun womu. Ge wee. Yinni Gusunɔ, a Dafidi yaayo win wahala ye u kua kpuron sɔ̃. 2Domi u wunɛ Yakɔbun Yinni damgii nɔɔ mwɛɛru kua u nɛɛ, 3u ǹ duɔ win kuu bekurugirɔ u sere nɛɛ, u koo kpuna win kpin yerɔ mi u ra wɛ̃re. 4U ǹ dom yĩbirimɔ, u ǹ maa doyamɔ 5ma n kun mɔ u wunɛ Yakɔbun Yinni damgii wãa yeru kua. 6Wee sa nua ma woodan kpakororu ta wãa Efarataɔ, ma sa tu deema Yaarin gberɔ. 7Su du Yinni Gusunɔn sãa yerɔ, kpa su nùn kpuna. 8Yinni Gusunɔ, a seewo kpa a na mi a ra wɛ̃re wunɛ ka wunɛn woodan kpakororu tèn wɔllɔ a ra wunɛn yiiko sɔ̃ɔsi. 9A de wunɛn yãku kowobu ba n gem swĩi, kpa be ba nun naanɛ sãa ba n nuku dobun kuuki mɔ̀. 10A ku wi a gɔsa yina Dafidi wunɛn sɔm kowon sɔ̃. 11Yinni Gusunɔ u Dafidi gem sɔ̃ɔwa ka bɔ̃ri u nɛɛ, u koo win nɔɔ mwɛɛru yibiawa kam kam te u nɛɛ, Dafidin bibun turowa u koo nùn kɔsire ko win bandu sɔɔ. 12Bii be, bà n win arukawani yibia, ma ba win woodaba mɛm nɔɔwa be u bu wɛ̃, ben bibun bwesera ta ko n bandu dii sere ka baadommaɔ. 13Yinni Gusunɔ u Siɔni gɔsa. U ye gɔsa ya n ka sãa win wãa yeru. 14Ma u nɛɛ, ya ko n sãa win wɛ̃ra yeru sere ka baadommaɔ. U koo sina mi, domi wiya u ye gɔsa. 15U koo ye domaru kua, kpa u ye dĩanu wɛ̃. 16U koo yen yãku kowobu faaba ko. Kpa be ba nùn naanɛ sãa bu nuku dobun kuuki ko. 17Miya u koo Dafidi wi u gɔsan dam sosi, kpa u win bweserun goo swĩi, u n sãa nge fitila. 18U koo de win yibɛrɛba bu sekuru wa. Adama wi, win sina furɔ ga ko n ballimɔwa win wiru wɔllɔ.

will be added

X\