1 Womu ge Dafidi u wom kowobun wirugii kua ka mɔrɔku. Ge wee. 2 Yinni Gusunɔ, a na a sun faaba ko. Wee gemgiba doona. Naanɛgii goo maa sari handunia sɔɔ. 3 Weesa baawure u ra n win winsim kuammɛ, u n nùn nɔni wɔ̃kumɔ ka gari dori. 4 Yinni Gusunɔ, a be ba tɔmbu fufu mɔ̀n nɔsu kɔruo. A be ba gari gerumɔ ka tii suabu marisio. 5 Domi ba gerumɔ ba mɔ̀, ba ra wa ye ba kĩ ben nɔɔ dobun saabu, ba gari gerubu yɛ̃, ba ǹ goon bɛrum mɔ. 6 Adama Yinni Gusunɔ, a nɛɛ, a wɔnwɔndo be ba dam dɔremɔ waamɔ. A sãaro be ba weeweenu mɔ̀ waamɔ. A be ba yãatam siemɔ waamɔ. Tɛ̃, kaa se a be kpuro faaba ko. 7 Yinni Gusunɔ, wunɛn gari yi dɛɛrewa. Yi sãawa nge sii gee si ba sɔwa nɔn nɔɔba yiru. Yinni Gusunɔ, na yi naanɛ sãa. 8 Wee tɔn kɔ̃sobu ba wãa yam kpuro. Ma tɔmba sankiramɔ ba dɔɔ. Yinni Gusunɔ, a sun kɔ̃suo. A sun gbaro ben nɔman di.
