1 Doo nɔɔrugiba be ba kun taarɛ mɔ ben sanu sanusu sɔɔ, ma ba sĩimɔ nge mɛ Yinni Gusunɔn wooda ya bu sɔ̃ɔsimɔ. 2 Doo nɔɔrugiba be ba win gere swĩi, ma ba nùn kasu gem ka tia, 3 ma ba ku ra gɔba ko, ba sĩimɔ win swɛɛ sɔɔ. 4 A wunɛn woodaba kuawa bu ka ye swĩi dee dee. 5 A de nɛn kookoosu su n swaa swĩi, n wa n ka wunɛn gere mɛm nɔɔwa. 6 Nà n wunɛn woodaba kpuro laakari sãa, saa yera sekura kun man mwaamɔ. 7 Nà n wunɛn sɔ̃ɔsi geeru gia, kon nun siara ka gɔ̃ru tia. 8 Kon wunɛn woodaba nɛnɛ. A ku man deri mam mam. 9 Aluwaasi ù n kĩ win sanu sanusu su n dɛɛre, sere u n wunɛn gari mɛm nɔɔwammɛ. 10 Na nun kasu ka nɛn gɔ̃ru kpuro. A de n wunɛn swaa swĩi. 11 Na wunɛn gari nɛnisi nɛn gɔ̃ruɔ kpa n ku ra ka nun torari. 12 Yinni Gusunɔ, na nun siara, a man wunɛn woodaba keu koosio. 13 Na nɔɔgiru sua na wunɛn gere kpuro kpara. 14 Wunɛn woodan mɛm nɔɔbu bu man nuku dobu wɛ̃ɛmɔ nge dukia baka. 15 Kon wunɛn sɔ̃ɔsiru bwisiku, kpa n wunɛn yiirebu nɔni doke. 16 Na kon nuku dobu ko wunɛn gere sɔɔ. Na ǹ maa wunɛn gari duarimɔ. 17 A nɛ wunɛn sɔm kowo durom kuo kpa n wa na n wãa, kpa n wa n wunɛn gere mɛm nɔɔwa. 18 A nɛn nɔni wukio, kpa n wa n gia gãa gee ni nu wãa wunɛn gari sɔɔ. 19 Na sãawa sɔɔ handunia ye sɔɔ. A ku man wunɛn woodaba berua. 20 Nɛn bwɛ̃ra ya ra n woowa baadomma wunɛn yiirebu sɔɔ kĩrun sɔ̃. 21 A ra tii suobu gerusi be, be ba sãa bɔ̃rurobu, ma ba ku ra wunɛn woodaba swĩi. 22 A man sekuru ka gɛndu wunario, domi na wunɛn gere swĩi. 23 Baa mɛ sina bibu ba ra sinɛ bu man wĩi, ka mɛ, nɛ, wunɛn sɔm kowo na ra n wunɛn sɔ̃ɔsiru bwisikumɔ. 24 Wunɛn woodaba ba ra man nuku dobu wɛ̃wa, kpa bu man bwisi kɛ̃. 25 Nɛ wee na mwia kpana nge wi u kpĩ tua sɔɔ. A man nɛn wãaru wesio nge mɛ a nɔɔ mwɛɛru kua. 26 Na nun nɛn wãarun daa kpuro tusia, ma a man suuru kua. A man wunɛn woodaba sɔ̃ɔsio. 27 A man ben asansi tubusio, kpa na n da wunɛn sɔm maamaakiginu bwisiku. 28 Wee na wuri mɔ̀ nuku sankiranun sɔ̃. A man dam kɛ̃ɛyɔ nge mɛ a nɔɔ mwɛɛru kua. 29 A de n ka weesun swaa tonda, kpa a man durom kua na n ka wunɛn gere swĩi. 30 Na gɔ̃ru doke n gem swĩi. Na wunɛn woodaba nɔni girari. 31 Na nɛn tii wɛ̃ be sɔɔ. Yen sɔ̃, a ku de n sekuru wa. 32 Wunɛn woodabara na swĩi, domi a nɛn nɔni wukia. 33 Yinni Gusunɔ, a man wunɛn swɛɛ sɔ̃ɔsio, kpa n kpĩ n yi swĩi nɛn wãarun tɔ̃ru kpuro sɔɔ. 34 A man bwisi kɛ̃ɛyɔ kpa n kpĩ n ka wunɛn woodaba mɛm nɔɔwa. 35 Na wunɛn swaa kĩ. A man sureo ye sɔɔ. 36 A de nɛn bwɛ̃ra yu wura ye sɔɔ. A ku de nɛn kĩru tu wura gobi gia. 37 A nɛn binɛ wunɔ gãa kankam di, kpa a de na n wãa wunɛn swɛɛ sɔɔ. 38 A wunɛn nɔɔ mwɛɛru yibio nɛ, wunɛn sɔm kowon sɔ̃, ta wãawa be ba nun nasien sɔ̃. 39 A man yaro seku te na nasien di, wunɛn siribu bu ra n wã. 40 Na kĩwa n wunɛn woodaba mɛm nɔɔwa too. A de na n wãa wãaru sɔɔ wunɛn gem sɔ̃. 41 Yinni Gusunɔ, a de a nɛn wɔnwɔndu wa, kpa a man faaba ko nɔɔ mwɛɛ te a man kuan sɔ̃. 42 Saa ye sɔɔ, kon kpĩ n be ba man sekuru dokemɔ gari wisi. Domi na nɛn naanɛ doke wunɛn gari sɔɔ. 43 A ku wunɛn gem wuna nɛn nɔɔn di, na yĩiyɔbu mɔ wunɛn siribu sɔɔ. 44 Ko na n wunɛn woodaba nɛniwa saa kpuro. Ya ko n wãa nɛn mi sere ka baadommaɔ. 45 Kon sĩ ka tii mɔru, domi wunɛn woodabara na kasu. 46 Kon ben gari sinambu sɔ̃. Na ǹ ko na n maa wãa sekuru sɔɔ. 47 Na wunɛn woodaba kĩ. Na ra n nuku dobu mɔ ye sɔɔ. 48 Na ra nɛn nɔma yiiye wɔllɔ n ka kanaru ko wunɛn gari yi na kĩn sɔ̃. Domi na kĩ na n yi bwisikumɔ nɛn gɔ̃ruɔ. 49 Wee a man yĩiyɔbu wɛ̃. A wunɛn nɔɔ mwɛɛru yaayo te a nɛ, wunɛn sɔm kowo kua. 50 Tera ta ra man nukuru yɛmiasie nɛn nɔni swãaru sɔɔ, kpa tu man wãaru wɛ̃. 51 Wee tii suobu ba man yɛ̃ɛsu wɔri. Adama ka mɛ, na ǹ wunɛn woodaba deri. 52 Yinni Gusunɔ, na wunɛn yellun siribu yaaye. Biya bu man dam kã. 53 Nà n wa tɔn kɔ̃sobu ba wunɛn woodaba deri, mɔru baka na ra ko. 54 Wunɛn garin sɔ̃na na ra womusu ko mi na sɔru dimɔ. 55 Wɔ̃kuru nà n wunɛn yĩsiru yaaya, na ra n wunɛn woodaba nɛnusiwa. 56 Ye ya sãa nɛgia, yera n wunɛn gere mɛm nɔɔwa. 57 Na maa wure na gerumɔ, Yinni Gusunɔ, nɛgia n wunɛn gere mɛm nɔɔwa. 58 Ka nɛn gɔ̃ru kpurowa na nun sokumɔ. A wunɛn nɔɔ mwɛɛru yaayo kpa a nɛn wɔnwɔndu wa. 59 Nà n nɛn daa bwisika, na ra wurewa n sĩ wunɛn swɛɛ sɔɔ. 60 Na ra n sɛndewa n ka da mi gia, na kun tɔ̃ru gɔsie. Kpa n wunɛn woodaba mɛm nɔɔwa. 61 Tɔn kɔ̃sobun yini man sikerenɛ. Adama ka mɛ, na ǹ wunɛn gari deri. 62 Wɔ̃ku suunu na ra sewa n nun siara wunɛn siri bi a ra ko dee deen sɔ̃. 63 Na sãawa be ba nun nasie kpuro ka be ba wunɛn woodaba mɛm nɔɔwammɛn bɔrɔ. 64 Yinni Gusunɔ, wunɛn durom yiba handunia kpuro sɔɔ. A man wunɛn woodaba kpuro sɔ̃ɔsio. 65 Yinni Gusunɔ, a ra wunɛn sɔm kowo gea kue nge mɛ a nɔɔ mwɛɛru kua. 66 A man laakari ka bwisi kɛ̃ɛyɔ domi na wunɛn woodaba naanɛ sãa. 67 N sere sekuru wa, na raa kɔ̃ɔrewa. Adama tɛ̃, na wunɛn gari nɛni. 68 A sãawa tɔn geo. A man wunɛn woodaba sɔ̃ɔsio. 69 Tii suobu ba man weesu koosimɔ. Adama nɛ, na wunɛn yiirebu nɛni ka nɛn gɔ̃ru kpuro. 70 Ben gɔ̃ru ga bɔɔbu, gãanu ku ra bu yeeri. Adama nɛ, wunɛn gari yi ra man nuku dobu wɛ̃. 71 N buram bo n sekuru wa kpa n ka kpĩ n wunɛn woodaba gia. 72 Na wunɛn nɔɔn gere kĩ n kere gãanu nɔrɔbu (1.000) ye ba kua ka wura ka sii geesu. 73 Wunɛn nɔma ya man mɔma. Yera ya man tãsisia. A man bwisi kɛ̃ɛyɔ n ka wunɛn woodaba gia. 74 Be ba nun nasie, bà n man wa, ba ra nuku dobu kowa. Domi na wunɛn nɔɔ mwɛɛru naanɛ sãa. 75 Yinni Gusunɔ, na yɛ̃ ma wunɛn siribu bu sãawa dee dee. Wunɛn bɔrɔkinirun sɔ̃na a man sekuru doke. 76 A de wunɛn durom mu man nukuru yɛmiasia nge mɛ a nɛ wunɛn sɔm kowo nɔɔ mwɛɛru kua. 77 A man wɔnwɔndu kuo kpa n wa na n wãa. Domi wunɛn sɔ̃ɔsiru ta ra man nuku dobu wɛ̃. 78 A be ba tii sue sekuru dokeo, wee ba man dam dɔremɔ kam sɔɔ. Adama nɛ, wunɛn woodabara na ra n bwisikumɔ. 79 Be ba nun nasie a de bu wurama nɛn mi. Be ba wunɛn woodaba yɛ̃ a de bu wurama nɛn mi. 80 A de na n wunɛn yiirebu mɛm nɔɔwammɛ mam mam, kpa n ku ra sekuru wa. 81 Na kasu a man faaba ko. Na wunɛn nɔɔ mwɛɛru naanɛ sãa. 82 Na kasu n wunɛn nɔɔ mwɛɛru gia sere nɛn nɔni dam dwiiya. Ma na tii sɔ̃ɔmɔ na mɔ̀, sere saa yerà kaa man nukuru yɛmiasia. 83 Na sãare nge gɔnan bɔɔru te ba bwɛ̃ wiisu sɔɔ. Na ǹ wunɛn woodaba duari. 84 Sere saa yerà kaa de nɛ, wunɛn sɔm kowo na n wãaru dii. Domma kaa be ba man nɔni sɔ̃ɔmɔ siri. 85 Tii suobu ba suura gbemɔ nɛn wuswaaɔ. Ba ǹ wunɛn woodaba swĩi. 86 Wunɛn gari kpuro yi naanɛ mɔ. Wee yibɛrɛba ba man nɔni sɔ̃ɔmɔ kam sɔɔ. A man faaba koowo. 87 N tiewa fiiko bu ka man sura bu go. Adama ka mɛ, nɛ, na ǹ wunɛn woodaba derimɔ. 88 A man nɛn wãaru wesio wunɛn durom sɔ̃, kpa n kpĩ n wunɛn gere mɛm nɔɔwa. 89 Yinni Gusunɔ, wunɛn gari yi ko n wãawa wɔllɔ sere ka baadommaɔ. 90 Wunɛn bɔrɔkiniru ta ko n maa wãawa sere ka baadommaɔ. Wuna a tem swĩi ma a mu sire dim dim. 91 Wunɛn woodaban sɔ̃na gãanu kpuro ka wãa gisɔ. Ni kpurowa nu maa wãa wunɛn sɔ̃. 92 Nà kun daa nuku dobu wa wunɛn wooda be sɔɔ, na n daa gu nɛn nɔni swãaru sɔɔ. 93 Na ǹ wunɛn gere duarimɔ pai, domi yera ya man wãaru wɛ̃ɛmɔ. 94 Na sãawa wunɛgii, a man faaba koowo. Wunɛn woodabara na kĩ n swĩi. 95 Tɔn kɔ̃sobu ba man mara bu go. Adama nɛ, wunɛn gariya na bwisikumɔ. 96 Ye ya yiba kpuro, ya maa nɔru mɔ. Adama wunɛn woodaba ba ǹ kpeeru mɔ. 97 Na wunɛn woodaba kĩ too. Ba ra n wãawa nɛn bwisikunu sɔɔ tɔ̃ɔ giriru baadomma. 98 Wunɛn woodaba ba ra man bwisi kɛ̃ n kere nɛn yibɛrɛba. Domi na ra n bu nɛniwa baadomma. 99 Na nɛn yinnibu kpuro yɛ̃ru kera. Domi wunɛn woodaba ba ra n wãawa nɛn bwisikunu sɔɔ. 100 Na durɔ tɔkɔnu bwisi kere, domi na wunɛn gere mɛm nɔɔwammɛ. 101 Na ku ra swaa kɔ̃sa mwɛ, kpa n wa n ka wunɛn gari nɛnɛ. 102 Na ku ra de wunɛn woodaba bu ka man tonda. Domi wuna a man keu sɔ̃ɔsimɔ. 103 Wunɛn gari yi tim dobu kere nɛn nɔɔwɔ. 104 Na kua bwisigii wunɛn woodaban sɔ̃. Yen sɔ̃na na weesun swɛɛ kpuro tusa. 105 Wunɛn gari yi sãawa nge fitila ye ya man swaa sɔ̃ɔsimɔ. 106 Na bɔ̃rua na sire na nɛɛ, kon wunɛn sɔ̃ɔsiru mɛm nɔɔwa, domi ta sãawa dee dee. 107 Na nɔni sɔ̃ɔre gem gem. Yinni Gusunɔ, a man dam kɛ̃ nge mɛ a nɔɔ mwɛɛru kua. 108 Yinni Gusunɔ, a nɛn siarabu wuro, kpa a man wunɛn sɔ̃ɔsiru giasia. 109 Nɛn wãara wãawa kari sɔɔ baadomma, adama na ǹ wunɛn woodaba duarimɔ pai! 110 Tɔn kɔ̃sobu ba man yɛ̃ri bɛrie. Ka mɛ, na wunɛn gere swĩi. 111 Wunɛn gari sãawa nɛn tubi ka baadommaɔ, domi yi sɔɔra nɛn gɔ̃ru dobu wãa. 112 Nɛn gɔ̃ru ga kĩ gu wunɛn woodaba mɛm nɔɔwa baadomma sere ka nɔrɔ. 113 Na gɔ̃rusu yirugibu tusa, adama na wunɛn woodaba kĩ. 114 Wuna a sãa nɛn kuku yeru ka nɛn tɛrɛru. Wunɛn nɔɔ mwɛɛru sɔɔra nɛn yĩiyɔbu wãa. 115 Tɔn kɔ̃sobu, i ka man tondo, kpa n wa n Gusunɔ nɛn Yinnin woodaba swĩi. 116 Yinni Gusunɔ, a man kɔ̃suo na n ka wãa nge mɛ a nɔɔ mwɛɛru kua. A ku man sekuru doke nɛn yĩiyɔbu sɔɔ. 117 A de a n sãa nɛn tãsi yeru kpa n faaba wa. Kpa na n wunɛn woodaba laakari sãa baadomma. 118 A ra be ba ra wunɛn woodaba deri gɛmwa. Domi ben nɔni wɔ̃kubu bu ǹ arufaani mɔ. 119 A ra tɔn kɔ̃sobu gɛriewa tem mɛn di nge nim yaka. Yen sɔ̃na na wunɛn woodaba swĩi. 120 Wunɛn nanum mu dera nɛn wasi diirimɔ. Na wunɛn siribu nasie. 121 Na wunɛn woodaba ka wunɛn gem mɛm nɔɔwammɛ. A ku man be ba man dam dɔremɔ nɔmu sɔndia. 122 A nɛ, wunɛn sɔm kowo nɔɔ mwɛɛru kuo ma kaa man somi. A ku de tii suobu bu man dam dɔre. 123 Nɛn nɔni dam dwiiya ye na wunɛn faaba ka wunɛn gem mɛ̀n nɔɔ mwɛɛru a kua mara. 124 A nɛ, wunɛn sɔm kowo kuo nge mɛ wunɛn tɔn geera nɛ. A man wunɛn woodaban keu sɔ̃ɔsio. 125 Na sãawa wunɛn sɔm kowo. A man bwisi kɛ̃ɛyɔ n ka wunɛn sɔ̃ɔsiru gia. 126 Yinni Gusunɔ, saa ya den tura a ka se domi wee ba wunɛn wooda saramɔ. 127 Adama nɛ, na ye kĩ n kere wura gean tii. 128 Na ye kpuro garisiwa dee dee. Na swɛɛ yi yi ǹ dɛnde kpuro tusa. 129 Wunɛn yiirebu bu ra n wã, yen sɔ̃na na bu nɛni. 130 Wunɛn garin giabu bu ra tɔnu yam bururasiewa, kpa yi bwisi sariba bwisi kɛ̃. 131 Na kasu gem ka tia n wa n wunɛn woodaba gia. 132 Yinni Gusunɔ a man mɛɛrima, kpa a man durom kua nge mɛ a ra be ba nun kĩ kue. 133 A de na n tãsa wunɛn gari sɔɔ. A ku de toraru garu ta n man wãasi. 134 A man wɔro tɔmbun dam dɔrebun di, kpa n kpĩ n wunɛn sɔ̃ɔsiru mɛm nɔɔwa. 135 A ka man nɔnu geu mɛɛrio, kpa a man wunɛn yiirebu sɔ̃ɔsi. 136 Wee na nɔni yĩresu kokumɔ nge daaru, domi tɔmba kun wunɛn woodaba mɛm nɔɔwɛ. 137 Yinni Gusunɔ, a sãawa gemgii. Wunɛn siribu bu ra n sãawa dee dee. 138 A wunɛn wooda yiiwa gem sɔɔ. Ya maa naanɛ mɔ. 139 Nà n nɛn yibɛrɛba wa be ba wunɛn gari duari, nɛn mɔru ra sewa. 140 Wunɛn gari yi naanɛ mɔ. Nɛ, wunɛn sɔm kowo na yi kĩ. 141 Wee na ǹ kpã, ma ba man gɛma. Ka mɛ, na ǹ wunɛn woodaba duari. 142 Wunɛn gem mu ku ra kpe. Mɛya wunɛn gari yi sãawa gem. 143 Nuku sankiranu ka nɔni swãara man wɔrimɔ, adama wunɛn woodaba ba ra man nuku dobu wɛ̃. 144 Wunɛn yiirebu bu sãawa dee dee sere ka baadommaɔ. A man bwisi kɛ̃ɛyɔ yi yi koo de na n wãa. 145 Yinni Gusunɔ, na nun sokumɔwa ka nɛn gɔ̃ru kpuro. A man wurario, kpa n kpĩ n wunɛn sɔ̃ɔsiru nɛnɛ. 146 Na nun kanamɔ, a man faaba koowo, kpa n kpĩ n wunɛn woodaba mɛm nɔɔwa. 147 Na ra kanaru kowa yam mu sere sãra, kpa na n wunɛn nɔɔ mwɛɛnu naanɛ sãa. 148 Yam mu sere sãra na ra sewa n ka wunɛn gari mɛɛri. 149 A nɛn nɔɔ nɔɔwɔ wunɛn durom sɔ̃. A man sirio nge mɛ a ra siri, kpa n wa na n wãa. 150 Be ba kɔ̃sa bwisikumɔ, be wee ba man turuku kua. Ba wunɛn woodaba deri. 151 Wunɛ Yinni Gusunɔ, a wãawa nɛn turuku. Wunɛn gari yi sãawa gem. 152 Na yɛ̃ saa yee yellun di ma a wunɛn woodaba yiiwa ba n ka wãa sere ka baadommaɔ. 153 A nɛn nɔni swãaru mɛɛrio, kpa a man wɔra. Na ǹ wunɛn woodaba duarimɔ. 154 A ka man yinɔ kpa a man yakia. A de na n wãa nge mɛ a nɔɔ mwɛɛru kua. 155 Tɔn kɔ̃soba kun faaba wasi, domi ba ku ra wunɛn sɔ̃ɔsiru kasu. 156 Yinni Gusunɔ, wunɛn durom mu kpã. A man sirio nge mɛ a ra siri, kpa n wa na n wãa. 157 Nɛn yibɛrɛ be ba man nɔni sɔ̃ɔmɔ ba dabi. Adama ka mɛ, na ǹ wunɛn gere yinamɔ. 158 Na tɔnu kamba tusa, domi ba ku ra wunɛn woodaba swĩi. 159 Yinni Gusunɔ, a n yɛ̃ ma na wunɛn woodaba kĩ. A de na n wãa wunɛn durom sɔ̃. 160 Gema mu sãa wunɛn garin nuuru. Wunɛn woodaba kpuro ba kon sãawa gem sere ka baadommaɔ. 161 Wee sina biba man nɔni sɔ̃ɔmɔ kam sɔɔ. Adama wunɛn gari tɔnawa na nasie. 162 Na ra n nuku dobu mɔ wunɛn gari sɔɔ nge wi u dukia baka wa u gura. 163 Na weesu tusa. Ma na wunɛn woodaba kĩ. 164 Sɔ̃ɔ teeru, nɔn nɔɔba yiruwa na ra nun siare wunɛn siri bi bu sãa dee deen sɔ̃. 165 Be ba wunɛn woodaba kĩ, ba ra n bɔri yɛn bakaru mɔ. Kɔ̃sa ku ra bu deemɛ. 166 Yinni Gusunɔ, na wunɛn faaba yĩiyɔ. Yen sɔ̃, na wunɛn woodaba mɛm nɔɔwɛ. 167 Na ra wunɛn yiirebu mɛm nɔɔwɛ. Na ra bu kã too too. 168 Na wunɛn yiirebu ka wunɛn woodaba swĩi, domi nɛn kookoosu kpuro wãa wunɛn wuswaaɔ. 169 A de a nɛn wuri nɔ. A man bwisi kɛ̃ɛyɔ nge mɛ a nɔɔ mwɛɛru kua. 170 A nɛn kanaru nɔɔwɔ. A man wɔro nge mɛ a nɔɔ mwɛɛru kua. 171 A ra man wunɛn woodaban keu sɔ̃ɔsi. A de wunɛn siarabu bu nɔɔra nɛn nɔɔn di. 172 Wooda be kpuro ba dɛɛrewa. A de n womu ko ben sɔ̃. 173 Na wunɛn sɔ̃ɔsiru wura. A na a man somi. 174 Yinni Gusunɔ, wunɛn faabawa na mara ka gem. Mɛya wunɛn woodaba ba ra man nuku dobu wɛ̃. 175 A de na n wunɛn siribu tãsiri, kpa na n wãa n ka nun siara. 176 Wee na sirenɛ nge yãa te ta kɔ̃ɔre. A nɛ, wunɛn sɔm kowo kasuo, na ǹ wunɛn woodaba duarimɔ.
