Womusu 118

1I Yinni Gusunɔ siaro, u sãawa tɔn geo. Win kĩru ta ra n wãawa sere ka baadommaɔ. 2Bɛɛ Isireliba kpuro, i wuro i nɛɛ, Yinni Gusunɔn kĩru ta ra n wãawa sere ka baadommaɔ. 3Bɛɛ yãku kowobu Aronin bweseru, i wuro i nɛɛ, Yinni Gusunɔn kĩru ta ra n wãawa sere ka baadommaɔ. 4Bɛɛ be i Yinni Gusunɔ nasie, i wuro i nɛɛ, Yinni Gusunɔn kĩru ta ra n wãawa sere ka baadommaɔ. 5Nɛn nuku sankiranu sɔɔ, na Yinni Gusunɔ somiru kana. U nɛn kanaru nua, ma u man yara. 6Yinni Gusunɔ u sãa nɛgii, na ǹ gãanu ganun bɛrum mɔ. Mba tɔnu u koo kpĩ u man kua. 7Yinni Gusunɔwa u sãa nɛn faaba kowo. Yen sɔ̃na ko na n yɛ̃ɛrimɔ nà n nɛn yibɛrɛban biru wa. 8A Yinni Gusunɔ naanɛ koowo ye kaa ka tɔnu naanɛ ko. 9A Yinni Gusunɔ naanɛ koowo ye kaa ka damgibu naanɛ ko. 10Bwese dabinu nu man tarusi, ma na nu yarinasia ka Yinni Gusunɔn dam. 11Nu man wukiriwa mam mam, ma na nu yarinasia ka Yinni Gusunɔn yĩsiru. 12Nu man mɔnsima nge tĩi. Adama na nu yarinasia ka Yinni Gusunɔn dam ma nu gbisuka nge sãki yi yi dɔ̃ɔ mwaara. 13Nu raa man bɔriamɔ nu ka man sura, adama Yinni Gusunɔ u man somiru na. 14Yinni Gusunɔwa u sãa nɛn dam. Wiya ko na n da siare. Wiya u man faaba kua. 15Nasaran kuuki yi nɔɔramɔ gemgibun yɛnusɔ. Yinni Gusunɔn dam mu sɔ̃ɔsira. 16U win nɔm geu sue, ga win dam sɔ̃ɔsimɔ. 17Na ǹ maa gbimɔ, ko na n wãawa, kpa n win sɔma ye u kuan gari kpara. 18Yinni Gusunɔ u man sɛɛyasia. Adama u ǹ man gɔɔ nɔmu bɛrie. 19I man gem kɔnnɔsu kɛniɔ, kpa n du n Yinni Gusunɔ siara. 20Win kɔnnɔ ge wee. Min diya gemgibu ba ra du. 21Yinni Gusunɔ, na nun siara, domi a nɛn kanaru mwa, ma a man faaba kua. 22Wee kpee te banɔbu ba yina, tera ta kua gani gɔmburun dam. 23Yinni Gusunɔwa u ye kua ma n kua maamaaki bɛsɛn nɔni sɔɔ. 24Yinni Gusunɔwa u tɔ̃ɔ te kua. Su nuku dobun kuuki ko. 25Yinni Gusunɔ, a sun somiɔ, kpa a sun kuurasia. 26Wi u sisi ka wunɛn yĩsiru u sãawa domarugii. Sa ko nùn siara Yinni Gusunɔn sãa yerɔ. 27Gusunɔ u sãawa Yinni. Wiya u sun yam bururasie. I yãku yaa bɔkuo. I ka ye doo sere yãku yerun kãanɔ. 28Gusunɔ, a sãawa nɛn Yinni. Kon nun siara. Kon nun wɔlle sua. 29I Yinni Gusunɔ siaro, u sãa tɔn geo. Win kĩru ta ra n wãawa sere ka baadommaɔ.

will be added

X\