Womusu 116

1Na Yinni Gusunɔ kĩ, domi u ra nɛn nɔɔ nɔ nà n nùn soka. 2U ra nɛn gari swaa daki. Wiya ko na n da soku nɛn wãarun tɔ̃ru kpuro sɔɔ. 3Gɔɔn yɔni yi raa man bɔkua, ma gɔribun wãa yerun nuku sankiranu man nɛni. Na wãa nɔni swãaru ka wuriribu sɔɔ. 4Yera na Yinni Gusunɔ nɔɔgiru sue na nɛɛ, Yinni Gusunɔ, a nɛn wãaru wɔro. 5Gusunɔ bɛsɛn Yinni u sãawa tɔn geo ka gemgii. Mɛya win wɔnwɔnda kpã. 6Yinni Gusunɔ u ra bwɛ̃ɛbwɛ̃ɛbu kɔ̃su. Na raa wɔnwɔndu soore, adama u man faaba kua. 7Nɛn bwɛ̃ra, a wɛ̃ro, domi Yinni Gusunɔ u man gea kua. 8Geema, u man wɔra gɔɔn di, ma u nɛn nɔni yĩresu woka, u ǹ dere n sokura. 9Kon sĩ win wuswaaɔ handunia ye sɔɔ. 10Na nùn naanɛ doke, baa mɛ na nɛɛ, na wɔnwɔndu soore. 11Nɛn nuku sankiraru sɔɔ, na nɛɛ, goo sari wi u naanɛ mɔ. 12Mba kon Yinni Gusunɔ dibu kɔsia gea ye u man kuan sɔ̃. 13Kon tam tãra win wuswaaɔ, kpa n win yĩsiru soku n ka nùn siara faaba ye u man kuan sɔ̃. 14Nɔɔ mwɛɛ ni na nùn kua, kon nu yibia win tɔmbu kpuron nɔni biru. 15Be ba Yinni Gusunɔ naanɛ sãan gɔɔ u sãawa gãa bakanu win mi. 16Yinni Gusunɔ, a nɛ, wunɛn sɔm kowo swaa dakio. Na sãawa wunɛn sɔm kowo tɔn kurɔn bii. Wuna a nɛn yorun wɛ̃ɛ bura. 17Yen sɔ̃na kon nun siarabun yãkuru kua, kpa n wunɛn yĩsiru soku. 18Nɔɔ mwɛɛ ni na nun kua, kon nu yibia wunɛn tɔmbu kpuron nɔni biru, 19wunɛn sãa yerɔ Yerusalɛmun suunu sɔɔ. Yen sɔ̃, i Yinni Gusunɔ siaro.

will be added

X\