Womusu 115

1Yinni Gusunɔ, n ǹ bɛsɛ sa bɛɛrɛ mɔ, wuna a bɛɛrɛ mɔ wunɛn tɔn geeru ka wunɛn bɔrɔkinirun sɔ̃. 2Mban sɔ̃na tɔn tukobu ba koo nɛɛ, mana Gusunɔ bɛsɛn Yinni u wãa. 3Gusunɔ bɛsɛn Yinni u wãa wɔllɔ, u mɔ̀ ye u kĩ. 4Adama tɔn tukoba ben bũnun bwãarokunu kuawa ka wura ka sii geesu. Nu sãawa tɔmbun nɔman sɔma. 5Bwãaroku ni, nu nɔsu mɔ, adama nu ku ra gari gere. Nu nɔni mɔ, adama nu ǹ yam waamɔ. 6Nu swasu mɔ, adama nu ǹ gari nɔɔmɔ. Nu wɛ̃ru mɔ, adama nu ǹ numiamɔ. 7Nu nɔma mɔ, adama nu ǹ ka gãanu babamɔ. Nu naasu mɔ, adama nu ku ra sĩ. Nin dɔkɔra kun maa nɔɔrɔ. 8Be ba bwãaroku ni mɔ̀ ka be ba ben naanɛ doke ni sɔɔ, ba sãawa nge ni. 9Bɛɛ Isireliba, i bɛɛn naanɛ dokeo Yinni Gusunɔ sɔɔ. U sãawa bɛɛn faaba kowo ka bɛɛn tɛrɛru. 10Bɛɛ yãku kowobu Aronin bweseru, i bɛɛn naanɛ dokeo Yinni Gusunɔ sɔɔ. U sãawa bɛɛn faaba kowo ka bɛɛn tɛrɛru. 11Bɛɛ be i Yinni Gusunɔ nasie, i bɛɛn naanɛ dokeo wi sɔɔ. U sãawa bɛɛn faaba kowo ka bɛɛn tɛrɛru. 12Yinni Gusunɔ u sun yaaye. U koo sun domaru kua. U koo Isireliba domaru kua. U koo Aronin bibun bweseru domaru kua. 13U koo be ba nùn nasie domaru kua, bukurobu ka bibu. 14U koo bɛɛ ka bɛɛn bibu win durom dabiasia. 15Yinni Gusunɔ u bɛɛ domaru kuo wi, wi u wɔllu ka tem taka kua. 16Wɔllu ta sãawa wigiru, ma u tɔmbu tem wɛ̃. 17N ǹ gɔribu ba ra Yinni Gusunɔ sã be, be ba wãa mi yam da n maari sɔ̃ɔ sɔ̃ɔ. 18Adama bɛsɛra sa ko nùn sã saa tɛ̃n di sere ka baadommaɔ. Yen sɔ̃, i Yinni Gusunɔ siaro.

will be added

X\