Womusu 112

1I Yinni Gusunɔ siaro. Doo nɔɔrugiiwa wi u Yinni Gusunɔ nasie, ma win woodaba ba nùn nuku dobu wɛ̃ɛmɔ. 2Yɛ̃ron bwesera koo dam ko handunia sɔɔ. Geegibun bibu ba koo domaru wa. 3Alafia ka dukia ko n wãa win yɛnuɔ. Win gem kun kpeemɔ ka baadommaɔ. 4Tɔn geo wi u wɔnwɔndu mɔ, u ra ka tɔnu duure, u maa sãa gemgii, wɔ̃kura yam dɛɛramɔ win sɔ̃. 5Doo nɔɔrugiiwa wi u ra bɔkure ka nuku tia, ma u ku ra goo taki di win sɔmburu sɔɔ. 6Domi geegii kun sokuramɔ pai. Ba ko n nùn yaayewa ka baadommaɔ. 7Labaari kɔ̃sa ku ra nùn nande. Win torora ra n sɔ̃wa sim sim u n Yinni Gusunɔ naanɛ sãa. 8U ku ra wurure, bɛrum kun nùn mɔ̀, sere u ka win yibɛrɛba kua mɛ u kĩ. 9U ra sãarobu kɛ̃nu kɛ̃ ka nuku tia. Win gem mu ko n wãawa ka baadommaɔ. Win dam mu koo sosi ka bɛɛrɛ. 10Tɔn kɔ̃so ù n nùn wa, win mɔru ra sewa, kpa u nùn wiru diirisi ka nuku gbisibu. Tɔn kɔ̃sobun yĩiyɔbu kpuro bu sãawa kam dirum.

will be added

X\