Womusu 108

1Womu ge Dafidi u kua. U nɛɛ, 2Gusunɔ, na sɔɔru sãa. Kon womu ko ka nɛn dwee yãnu, ka nɛn gɔ̃ru kpuro. 3Nɛn mɔrɔku ka nɛn guuru, i dom yando, kpa n womu ko yam sãreru. 4Yinni Gusunɔ, kon nun siara tɔmbun suunu sɔɔ sere ka baadommaɔ. Kon nun womu kua bwesenu sɔɔ. 5Domi wunɛn tɔn geera kpã ta wɔllu girari. Mɛya maa wunɛn bɔrɔkinira sɔ̃ɔsire sere guru wirɔ. 6Gusunɔ, a seewo a tii wɔlle sua. Kpa wunɛn yiiko yu sɔ̃ɔsira handunia kpuro sɔɔ. 7Kpa a wa a ka bɛsɛ wunɛn kĩnasibu faaba ko. A bɛsɛn kanaru nɔɔwɔ kpa a sun faaba ko ka wunɛn nɔm geu. 8Gusunɔ u gerua win sãa yee dɛɛrarɔ u nɛɛ, u koo nasara wa. U koo Sikɛmu bɔnu ko kpa u tɔmbu Sukɔtun wɔwa yabua. 9Wiya u Galadi mɔ. Wiya u maa Manase mɔ. Efaraimu ya sãawa nge win sii furɔ kɔkɔru. Ma Yuda ya sãa nge win sina dɛka. 10Adama Mɔabu ya sãawa win woburutia. U koo Edɔmu bara nɔɔ teu kɔ̃ɔwa u ka sɔ̃ɔsi ma ya kua wigia. Kpa u nuku dobun kuuki ko Filisitiban tem sɔɔ. 11Wara u koo ka man da wuu gbãraruguu gen mi. Wara u koo man kpara u ka da Edɔmuɔ. 12Yinni Gusunɔ, wuna kaa ka man da, wunɛ wi a raa sun yina, ma a ku ra maa ka bɛsɛn tabu kowobu yari. 13A sun somiɔ su ka yari nɔni swãarun di. Tɔnun somiru ta sãawa wom dirum. 14À n wãa ka bɛsɛ, sa ko kpĩ su tabu ko ka wɔrugɔru. Kpa a bɛsɛn yibɛrɛba kɔsuku.

will be added

X\