Womusu 107

1I Yinni Gusunɔ siaro win tɔn geerun sɔ̃. Win durom mu ra n wãawa sere ka baadommaɔ. 2Be u yakia, bu nùn siaro. Be u wɔra yibɛrɛban nɔman di, bu nùn tɔmɔ. 3Be u mɛnnama tem kpuron di, bu nùn siaro. Be u sokuma saa sɔ̃ɔ yari yeru gian di, ka sɔ̃ɔ duu yeru gian di, ka sɔ̃ɔ yɛ̃san nɔm geu gian di, ka sɔ̃ɔ yɛ̃san nɔm dwaru gian di, bu nùn wɔlle suo. 4Wee ba raa kɔ̃ɔre gbaburɔ mi gãanu ku ra kpi ba sirenɛ, ba ǹ wuu wa mi ba koo sina. 5Gɔ̃ɔru ka nim nɔru ga bu go. Ma ba wurure ba ǹ dam mɔ. 6Ben nɔni swãa te sɔɔ, ba Yinni Gusunɔ nɔɔgiru sue ba somiru kana, ma u bu yara nɔni swãa ten di. 7U bu kpara swaa gea sɔɔ ba ka tura mi ba koo sina. 8Bu nùn siaro win tɔn geeru ka win sɔm maamaakiginun sɔ̃ ni u ra ko tɔnun sɔ̃. 9Domi u wi nim nɔru ga mɔ̀ nim kã. Ma u wi gɔ̃ɔra mɔ̀ debusia. 10Gabu ba raa wãa yam wɔ̃kuru sɔɔ sere gɔribun wãa yerɔ ba yoru dimɔ, ma ba ka bu yɔni bɔkua 11yèn sɔ̃ ba Yinni Gusunɔn gari yina, ma ba wi, Wɔrukoon bwisi kɛ̃ru gɛma. 12Ma u dera ba tii kawa wahala yen sɔ̃. Ma ba wɔruka ba gu, goo kun bu somiru de. 13Adama ben nɔni swãa te sɔɔ, ba Yinni Gusunɔ nɔɔgiru sue ba somiru kana. Ma u bu yara nɔni swãa ten di. 14U bu yara yam wɔ̃ku te, ka gɔribun wãa yee ten min di, ma u ben yorun yɔni yi kusia. 15Bu Yinni Gusunɔ siaro win tɔn geerun sɔ̃. Bu nùn siaro win sɔm maamaakiginun sɔ̃ ni u ra ko tɔnun sɔ̃. 16Domi u sii gandun gamboba kɔsuka. Ma u kɔkɔrɔ sisugii bɔɔka. 17Gari bakasu su tii kua wɔnwɔndobu sin daa ka sin toranun sɔ̃. 18Ba ku ra maa dĩanu kã ma ba gɔɔ turuku kua. 19Ben nɔni swãa te sɔɔ, ba Yinni Gusunɔ nɔɔgiru sue ba somiru kana. Ma u bu yara nɔni swãa ten di. 20Ka win gariya u bu faaba kua, ma u bu yara wɔru bɔkɔ gen min di. 21Bu Yinni Gusunɔ siaro win tɔn geeru ka win sɔm maamaakiginun sɔ̃ ni u ra ko tɔnun sɔ̃. 22Bu nùn siarabun yãkunu kuo. Kpa bu win sɔm maamaakigii nin gari kpara ka nuku dobu. 23Be ba goo nimkusu dua, ma ba ben sɔmburu mɔ̀ si sɔɔ, 24ba Yinni Gusunɔn nɔman sɔma wa ka maa maamaaki ye u kua nim wɔ̃ku sɔɔ. 25U gari gerua, ma u dera woo bɔkɔ ga seewa ga nim kurenu seeya. 26Nù n da wɔllɔ, kpa nu sarama. Be ba wãa goo nimkuu si sɔɔ, ba nande kari yen sɔ̃. 27Tirerabu bu mwa, ba bãarimɔ nge tam nɔrobu. Ben bwisi kpuro yi kpa. 28Ben nɔni swãa te sɔɔ, ba Yinni Gusunɔ nɔɔgiru sue ba somiru kana. Ma u bu yara nɔni swãa ten di. 29U woo guna ye yɔ̃rasia, ma nim kurenu nu mari. 30Ma be kpuron nuki dora ye u ka ye kpuro marisia. Ma Yinni Gusunɔ u bu kpara u ka tura sere mi ba dɔɔ. 31Bu Yinni Gusunɔ siaro win tɔn geeru ka win sɔm maamaakiginun sɔ̃ ni u ra ko tɔnun sɔ̃. 32Bu nùn wɔlle suo mi tɔmba mɛnnɛ. Bu nùn siaro guro gurobun suunu sɔɔ. 33Yinni Gusunɔwa u ra daarun nim gberasie, kpa u bwiin nim kpeerasia mam mam. 34Kpa u tem gem gɔsia tem bɔrugum mɛn tɔmbun nuku kɔ̃surun sɔ̃. 35Wi turowa u ra mi gãanu ku ra kpi gɔsie nim bwee bakaru. Kpa u tem gbeba gɔsia nim bwii. 36Kpa u be ba gɔ̃ɔru barɔ sinasia mi, kpa bu wuu ko mi ba koo sina, 37kpa bu resɛm dãnu duure mi, nu ma dabi dabiru. 38U ra bu domaru kue bu dabia. Kpa u ben yaa sabenu kuurasia. 39Adama gabu ba dabiru kaare ba wãa sekuru sɔɔ yèn sɔ̃ ba yoru dimɔ ba nɔni sɔ̃ɔre. 40Ma Yinni Gusunɔ u dera ba ben wirugibu gɛma, ma ba sirenɛ kam sɔɔ ba ǹ yɛ̃ mi ba dɔɔ. 41Adama u ra sãaro yare win sãarun di. Kpa u win bweseru dabiasia nge sabe gɔ̃su. 42Gemgibu bà n nùn wa, ba ra yɛ̃ɛriwa. Kpa tɔn kɔ̃sobu bu nɔɔ mari. 43Wi u bwisi mɔ, u de u gari yi kpuro nɛnɛ kpa u gia ma Yinni Gusunɔ u sãawa duromgii.

will be added

X\