Womusu 106

1I Yinni Gusunɔ siaro. I Yinni Gusunɔ siaro, domi u sãawa tɔn geo. Win kĩru ta ra n wãawa sere ka baadommaɔ. 2Wara u koo Yinni Gusunɔn sɔm maamaakiginu gere. Wara u koo kpĩ u nùn tɔma u naamwɛ. 3Doo nɔɔrugiba be ba win woodaba mɛm nɔɔwɛ. Doo nɔɔrugiba be ba gem swĩi baadomma. 4Yinni Gusunɔ, a man yaayo durom mɛ a ra wunɛn tɔmbu kuen sɔ̃. A man yaayo kpa a bu somi. 5Kpa n ben nuku dobu wa be, be a gɔsa. Kpa n nuku dobu ko ben nuku doo bin sɔ̃. Kpa n yɛ̃ɛri ka be sannu be, be ba sãa wunɛn arumani. 6Wee sa tora nge bɛsɛn baababa, sa kɔ̃sa kua. 7Sanam mɛ bɛsɛn sikado be, ba wãa Egibitiɔ, ba ǹ wunɛn sɔm maamaakigii ni garisi. Ba ǹ wunɛn durom mɛ yaaye mɛ a bu sɔ̃ɔsi nɔn dabi dabinu. Ma ba nun seesi nim wɔ̃kuɔ ge ba mɔ̀ Naa yari. 8Adama a bu faaba kua wunɛn yĩsirun sɔ̃, a ka wunɛn dam sɔ̃ɔsi. 9A nim wɔ̃ku ge ba mɔ̀ Naa yari gbãre ma ga gbera. A dera ba sĩa gen suunu sɔɔ gbebum nge tem saaramɔ. 10A bu yakia saa wi u bu tusan nɔman di. A bu wɔra yibɛrɛban nɔman di. 11Nim mu ben yibɛrɛba wukiri, baa ben turo u ǹ kisire. 12Ma ba wunɛ Yinni Gusunɔn gari naanɛ kua. Ma ba nun siaramɔ ka womusu. 13Adama mii mii, ba wunɛn sɔm maamaakigii ni duari. Ba ǹ maa mara a wunɛn himba yibia. 14Ben binɛ ya seewa gbaburɔ, ma ba wunɛ Gusunɔn laakari mɛɛra mi. 15A bu yaa wɛ̃ ye ba bikia, ma ba di ba deba too. 16Yera ba ka Mɔwisi ka Aroni wi ba yi nɛnɛm wunɛn sɔmburun sɔ̃ nisinu seewa sansaniɔ. 17Ma tem mu nɔɔ wukia mu Datani mwɛ. Ma mu maa Abiramu ka win tɔmbu wukiri. 18Dɔ̃ɔ u ben tɔmbu kpuro di. Dɔ̃ɔ yara ya tɔn kɔ̃sobu di. 19Ba naa buu sii ganduguu kua Horɛbuɔ. Ma ba yiira ba gu sãwa. 20Ba wunɛ Gusunɔ wi a sãa ben bɛɛrɛ kɔsina ka kɛtɛ ye ya ra yakasu di. 21- 22Ba wunɛ Gusunɔ ben faaba kowo duari, wunɛ wi a bu gãa bakanu kua Egibitiɔ Kamun temɔ. A sɔm maamaakiginu kua mi. A sɔm maamaakiginu kua nim wɔ̃kuɔ ge ba mɔ̀ Naa yari. 23Yen biru, a gɔ̃ru doke a bu kpeerasia. Adama Mɔwisi wunɛn sɔm kowo u nun suuru kana a ka wunɛn mɔru suresia, kpa a ku maa bu kam koosia. 24Ba tem durom mɛ gɛma. Ba ǹ wunɛ Yinni Gusunɔn gari naanɛ kue. 25Ba wɔkiwa ben kunɔ. Ba ǹ wunɛn gari mɛm nɔɔwɛ. 26Ma a nɔma sua wɔllɔ a bɔ̃rua ma kaa bu kam koosia gbaburɔ. 27Kpa a ben bibu yarinasia tem kpuro sɔɔ bwese tukunun suunu sɔɔ. 28Ba tii bũu wi ba mɔ̀ Baali Peori wɛ̃. Ma ba yãkunu di ni ba gɔribu kua. 29Ma ba wunɛ Yinni Gusunɔn mɔru seeya ka ben kookoosu. Yera kɛsi kɛsi gɔɔ u dua ben suunu sɔɔ. 30Ma Finɛɛsi u wunɛ Gusunɔ kana, ma gɔɔ wi, u yɔ̃ra. 31Ma a nùn garisi gemgii sere ka win bibun bweserɔ ka baadommaɔ. 32Ba maa wunɛ Yinni Gusunɔn mɔru seeya nim mɛ ba ra soku Mɛriban bɔkuɔ. Ma a Mɔwisi sɛɛyasia ben sɔ̃. 33Domi ba nùn nuki sanka. Ma u ǹ bwisika u ka gari gerua. 34Ba ǹ Kananin bwese ni go ni a nɛɛ, bu go. 35Ba ka nu burinawa, ma nu bu nin kookoosu tie. 36Ma ba nin bũnu sãwa. Ma nu kua ben yina. 37Ba ka ben bii tɔn durɔbu ka tɔn kurɔbu bũu yãkunu kua. 38Nge mɛya ba gemgibun yɛm yari. Ba ka ben bibu Kananin bũnu yãkuru kua. Ma tem mɛ kpuro mu disi duura tɔn gobe ten sɔ̃. 39Ba disi duura ben kookoosun sɔ̃. Domi su dera ba ra n bũnu gasirimɔ. 40Ma wunɛ Yinni Gusunɔ a ka wunɛn tɔmbu mɔru bɛsira, a bu tusa be, be ba sãa wunɛn arumani. 41A bu bwese tukunu nɔmu sɔndia ni nu bu tusa nu taare. 42Ben yibɛrɛba ba bu dam dɔre. Ma ba bu sekuru doke. 43Nɔn dabina a bu yakia. Adama ba yɔ̃rariwa ba n nun seesi. Ma ba kua wɔnwɔndobu ben durum sɔ̃. 44A ben nɔni swãaru wa sanam mɛ a ben weeweenu nua. 45A wunɛn arukawani yaaya. Ma a ben wɔnwɔndu wa wunɛn durom bakam sɔ̃. 46A dera be ba bu yoru nɛni ba ben wɔnwɔndu wa. 47Gusunɔ bɛsɛn Yinni, a sun faaba koowo. A sun wunɔ bwese tukunun suunu sɔɔn di, kpa a sun mɛnna, su wa su wunɛn yĩsi dɛɛraru tɔma, kpa sa n yɛ̃ɛrimɔ su ka nun sã. 48Gusunɔ bɛsɛ Isireliban Yinni, sa ko n nun siaramɔwa sere ka baadommaɔ. Kpa tɔmbu kpuro bu nɛɛ, ami! I Yinni Gusunɔ siaro.

will be added

X\