Womusu 105

1I Yinni Gusunɔ siaro. I win yĩsiru sokuo. I win gea ye u kua kparo. 2I nùn womu kuo. I win sɔm maamaakiginu kparo. 3I nuki doro wi, Yinni Gusunɔn yĩsi dɛɛrarun sɔ̃. Be ba nùn kasu bu nukuru doro. 4I Yinni Gusunɔn dam kasuo. I kasuo i n ka nùn wãa. 5- 6Bɛɛ Aburahamu Gusunɔn sɔm kowon bweseru, bɛɛ Yakɔbun bweseru, bɛɛ be u gɔsa, i win sɔm maamaakigii ni yaayo. I siribu yaayo bi u bɛɛ kua. 7Wiya Gusunɔ bɛsɛn Yinni wi u koo handunia kpuro siria. 8U ku ra win arukawani ye u ka tɔmbu bɔkua duari sere ka baadommaɔ. U ra n ye yaayewa sere ka ben bibun bibun waatiɔ. 9Arukawani yera u ka Aburahamu ka Isaki bɔkua. 10U ka Yakɔbu wi ba mɔ̀ Isireli arukawani ye bɔkua ye ya ko n wãa sere ka baadommaɔ. 11U nɛɛ, kon nun Kananin tem wɛ̃. Mɛya mu ko n sãa wunɛn tubi wunɛ ka wunɛn bibun bweseru. 12Saa ye sɔɔ, ba ǹ dabi. Ba sãawa sɔbu mi. 13Ba ra n bɔsuwa tem ka tem sɔɔ. Bà n da bwese tenin mi, bu wura teɔnɔn mi. 14Adama Gusunɔ kun dere bweseru garu tu bu dam dɔre. U sinambu sɛɛyasiawa ben sɔ̃. 15U nɛɛ, i ku be na gɔsa baba. I ku be, nɛn sɔmɔbu kɔ̃sa kua. 16U dera gɔ̃ɔra na tem mɛ sɔɔ. Ma ba dĩanu bia bu di. 17Ma u dera goo gbia u da tem mi ben sɔ̃. Wiya Yosɛfu wi ba dɔra nge yoo. 18Ba ka nùn yɔni bɔkua naasɔ. Ma ba nùn sisun gandaru dokea wĩirɔ. 19Ba win laakari mɛɛra sere yu ka koora ye u raa gerua. 20Saa ye sɔɔra sina boko u wooda wɛ̃ u nɛɛ, bu nùn yarama. Ma u dera ba nùn kusia. 21Ma u nùn kua win yɛnu ka win ye u mɔ kpuron wirugii, 22kpa u wa u ka win sina asakpɔbu kpara nge mɛ u kĩ. Kpa u sina bokon bwisi kɛ̃ɔbu bwisi kɛ̃. 23Saa yera Yakɔbu ka wigibu ba na ba sina Egibitiɔ Kamun bweserun temɔ. 24Ma Gusunɔ u dera ba marura too. Ba dam kua ba ben yibɛrɛba Egibitigibu kera. 25Ma u yibɛrɛ ben gɔ̃ru gɔsia. Ba wi, Gusunɔn tɔn be tusa. Ma ba bu nɔni sɔ̃ɔwa be, be ba sãa win sɔm kowobu mi. 26Ma u Mɔwisi ka Aroni gɔsa ba kua win sɔm kowobu, ma u bu gɔra. 27Ma ba maamaaki kua ka win dam tɔn ben suunu sɔɔ Kamun tem mi. 28U dera yam wɔ̃ku sinumgiru ta na. Ka mɛ, Egibitigii be, ba ǹ wi, Gusunɔn gere wure. 29U ben nim gɔsia yɛm ma swɛ̃ɛ kpuro yi gu. 30U maa dera surenu nu yiba ben tem sɔɔ sere ka sina bokon kpin yerɔ. 31U dera gbabu swɛ̃ɛ ka gaanikunu nu na ben tem kpuro sɔɔ. 32Ma u dera guru kpenu ka dɔ̃ɔ na tem mɛ sɔɔ. 33Ma ya ben dãa gbaanu ka dãa ni nu tie ben tem mɛ sɔɔ kpuro kam koosia. 34Yen biru, u dera twee yi na dabi dabinu. 35Ma yi tem min yakasu ka mɛn gbean dĩanu kpuro di. 36U maa Egibitigibun bii gbiikobu go, be, be ba mara ben aluwaasiru sɔɔ. 37Ma u win tɔmbu yara Egibitin di ba wura ka sii geesu wa ba sɔɔwa. Ben goo kun maa sanum kpanɛ swaa sɔɔ. 38Saa ye sɔɔra Egibitigibun nukura dora yèn sɔ̃ Isireliba ba doona. Domi ba raa ben bɛrum mɔ too. 39Ma Gusunɔ u Isireliba guru wii wuronu wukiri, ma u bu yam bururasie wɔ̃kuru bu ka yam wa. 40Ye ba tura gbaburɔ, yera ba Yinni Gusunɔ nɔɔgiru sue ba dĩanu kana, ma u bu kusunu wɛ̃. Mɛya u dera pɛ̃ɛ ya na wɔllun di ba di ba deba. 41U kperu wukia ma nim mu kurama mu tɛria nge daaru tem diraɔ. 42Domi u win nɔɔ mwɛɛ dɛɛra te yaaye te u win sɔm kowo Aburahamu kua. 43U win tɔn be u gɔsa yara ka nuku dobu. Ma ba nuku dobun kuuki mɔ̀. 44Ma u bu bwesenu ganun tem wɛ̃. Ma ba bwese nin gberun are tubi di, 45bu wa bu ka wi, Gusunɔn woodaba mɛm nɔɔwa. Ǹ n mɛn na, i Yinni Gusunɔ siaro!

will be added

X\