Womusu 104

1Yinni Gusunɔ, kon nun siara. Gusunɔ nɛn Yinni, a kpã, a ǹ nɔru mɔ. Yam bururam ka yiiko ya nun wukiri. 2A ra tii yam bururam wukiri nge bekuru. A ra wɔllu tɛrie nge beku bakaru. 3Wunɛn wãa yera wãa sere wɔllun nim wɔllɔ. Ma guru wira sãa wunɛn tabu kɛkɛ. Ma a bɛllimɔ wom wɔllɔ. 4Ma a woo kua wunɛn gɔro. Ma guru maakinu kua wunɛn sɔm kowobu. 5A tem swĩi mɛn kpɛɛkpɛɛku wɔllɔ. Mu ǹ wɔrumamɔ sere ka baadommaɔ. 6A dera nim mu mɛ wukiri sere ka guunɔ nge beku bakaru. 7Adama ye a nim mɛ narua, ma mu doona. Ye mu wunɛn gbãsukubu nua, mu duka sua, 8mu sara guunun di, mu da wɔwi sɔɔ sere mi a mu ayeru kua. 9A nim mɛ yɔ̃ra yeru kua mu ku raa ka sara mu maa tem wukiri. 10Wuna a bwiin nim kpare mɛ mu kokumɔ guunun baa sɔɔ. 11Miya gbeeku yɛɛ ka gbeeku kɛtɛkunu nu ra nɛ nu nim nɔ. 12Yen bɔkuɔra gunɔsu su sin sokunu mɔ. Ma su wãa dãa kikisɔ su swĩi dori mɔ̀. 13Saa wɔllun di, a ra de gura yu guunu swee, kpa tem mu wunɛn sɔman are di. 14Kpa a de yakasu su kpi yaa sabenun sɔ̃ ka dĩa ni tɔnu u koo din sɔ̃. 15Kpa bu tam wa ba n ka nuku dobu mɔ̀. Kpa bu gum wa ben wasi yi n ka wã. Kpa bu dĩanu wa ben wasi yi n ka dam mɔ. 16Baa ka dãa koo bakanɔ, nu ra nim wa mɛ̀n bukata nu mɔ nge dãa ye ba mɔ̀ sɛduru ye ya wãa Libaniɔ. 17Miya gunɔsu su ra nɛ su sin sokunu ko. Miya kpakpayɛ gbeeku ga ra gen wãa yeru ko. 18Guu ni nu gunu nu kua kpee bɛran wãa yeru. Ma kpee baa maa kua yaa ye ba mɔ̀ damaan wãa yeru. 19Yinni Gusunɔ, wuna a suru kua a ka saaba wunana. Sɔ̃ɔ u yɛ̃ saa ye u koo kpuna. 20Yam wɔ̃kuru tà n tunuma, yam tĩrawa mi. Saa ye sɔɔra gbeeku yɛɛ yi ra bɔsum se. 21Gbee sinan piiminu nù n yaa wa, nu ra kukiriwa nu ka nun nin dĩanu bikia. 22Sɔ̃ɔ ù n yara, nu ra wurewa nin wãa yerɔ nu kpuna. 23Kpa tɔnu u maa yari u da u win sɔmburu ko sere sɔ̃ɔ u ka du. 24Yinni Gusunɔ, wunɛn sɔma ya dabi. A ye kpuro kua ka laakari. Wunɛn taka koora ya wãa tem sɔɔ kpuro. 25Wee nim wɔ̃ku ga kpã, ga maa yasu. Ge sɔɔra yɛɛ dabi dabinu wãa, baka ka buu. 26Gen wɔllɔwa goo nimkusu su sĩimɔ. Miya a dera yaa baka ya wãa ya dweemɔ gen nim kurenu sɔɔ. 27Yɛɛ kpuro, wunɛ turowa yi mɛɛra yi ka yin dĩanu wa nin saa sɔɔ. 28À n yi wɛ̃ kpa yi mwa. À n yi yɔ̃sua kpa yi debu. 29À n yi biru kisi, yi ra nandewa. À n yi wɛ̃siaru wunari, yi guwa mi, kpa yi gɔsia tem. 30À n maa yi wɛ̃siaru wɛ̃, yi ra sewa kpa tem mu wurama nge yellu. 31Yinni Gusunɔ, wunɛn yiiko yu dakaa da. Kpa a n nuku dobu mɔ ye a kuan sɔ̃. 32À n tem mɛɛra, mu ra yĩiriwa. À n maa guunu baba, wiisa su ra yari. 33Kon Gusunɔ nɛn Yinni womu kua nɛn wãarun tɔ̃ru kpuro sɔɔ. Kon nùn tɔma sere ka nɛn gɔɔn tɔ̃rɔ. 34Yinni Gusunɔ, a de nɛn gari yi nun dore. Na kĩ n nuku dobu ko wunɛ sɔɔ. 35Durumgibu bu gbio, kpa ba kun maa wãa tem mɛ sɔɔ. Na Yinni Gusunɔ siara ka nɛn gɔ̃ru kpuro. I Yinni Gusunɔ siaro.

will be added

X\