Womusu 103

1Womu ge Dafidi u kua. U nɛɛ, kon Yinni Gusunɔ siara. Kon win yĩsi dɛɛraru tɔma ka nɛn gɔ̃ru kpuro. 2Kon Yinni Gusunɔ siara. Win ye u kua, na ǹ duarimɔ, baa yen tia. 3U ra man nɛn toranu kpuro suuru kue. U ra nɛn baranu kpuro kpeesie. 4U ra man yare saa siki wɔrun di. U ra man durom ka wɔnwɔndu kue. 5U ra nɛn wãaru doo nɔɔru yibie. Kpa u man ko nge aluwaasi nɛn tɔkɔru sɔɔ, na n dam mɔ nge gunɔ bakeru te ta yɔ̃ɔwa. 6Yinni Gusunɔ u ra siriwa gem sɔɔ. U ra be ba dam dɔremɔ wɔre. 7U Mɔwisi win woodaba sɔ̃ɔsi. Ma u Isireliba win sɔm maamaakiginu sɔ̃ɔsi. 8Yinni Gusunɔ u wɔnwɔndu mɔ. U ra maa tɔnu durom kue. Win durom mu kpã. Win mɔru ku ra se fuuku. 9U ku ra tɔmbu gerusi kiri kiri. U ku ra maa mɔru ko n ka tɛ. 10U ku ra sun sɛɛyasie nge mɛ bɛsɛn torara nɛ. U ku ra sun bɛsɛn toranu kɔsie. 11- 12Adama nge mɛ sɔ̃ɔ yari yeru ta ka sɔ̃ɔ duu yeru tondinɛ, nge mɛya u ra maa bɛsɛn toranu tondasie. Nge mɛ wɔlla ka tem toma, nge mɛya win durom mu kpãaru nɛ be ba nùn nasien mi. 13Nge mɛ tundo u ra n win bibun wɔnwɔndu mɔ, nge mɛya Yinni u be ba nùn nasien wɔnwɔndu mɔ. 14Domi u yɛ̃ ye ba ka sun taka kua. U ǹ duari ma yanima ba ka sun mɔma. 15Tɔnun wãarun tɔ̃nu nu ku ra tɛ. Nu sãawa nge yakasu. U ra sewa nge dãa wɛ̃su. 16Woo gà n su swee kpa su doona. Baa sin yĩreru a ǹ maa wasi. 17- 18Adama Yinni Gusunɔn durom mu ra n wãawa sere ka baadommaɔ be ba nùn nasien mi, ma ba win arukawani nɛni, ma ba win woodaba mɛm nɔɔwammɛ. Mɛya maa win gem mu ra n ka bu wãa sere ka ben bibun bibɔ. 19Yinni Gusunɔ u win sina gɔna tɛria wɔllɔ. Ma u bandu dii gãanu kpuron wɔllɔ. 20Bɛɛ Yinni Gusunɔn gɔradoba, bɛɛ be i dam mɔ i ra win gari mɛm nɔɔwɛ, i nùn siaro. 21Bɛɛ win tabu kowobu kpuro, bɛɛ be i nùn sãamɔ, i win kĩru mɔ̀, i nùn siaro. 22Bɛɛ win taka koora, i nùn siaro mi u bandu dii kpuro. Yinni Gusunɔ, kon nun siara.

will be added

X\