1 Wɔnwɔndon kanaru sanam mɛ u nuki sankire ma u win weeweenu Yinni Gusunɔ saariammɛ. 2 Yinni Gusunɔ, a nɛn kanaru swaa dakio. A de a nɛn wuri nɔ. 3 A ku man biru kisi sanam mɛ na nuki sankire. A man swaa dakio sanam mɛ na nun soku, a man wurari fuuku. 4 Domi nɛn wãarun tɔ̃ra doonɔ nge wiisu, ma nɛn kukunu dɔ̃ɔ mɔ̀ nge dãa nɔɔ. 5 Nɛn torora kara ma nɛn gɔ̃ru ga gbera nge yakɔ gbebu, sere dĩanu kun man binɛ mɔ̀. 6 Nɛn weeweenun saabu na woora. 7 Na ka kpakpayɛ gbeeku weenɛ. Na sãawa nge booro ge ga wãa bansɔ. 8 Na ku ra dweeye, na sãawa nge gunɔ ge ga wãa ge teu diru wɔllɔ. 9 Nɛn yibɛrɛba ba ra n man wɔmmɔwa baadomma kpa ba n ka nɛn yĩsiru bɔ̃rumɔ. 10 Wunɛn mɔru bakan sɔ̃, torom mu kua nɛn dĩanu. Ma nɛn nɔni yĩresu su wɔrikimɔ nɛn nim nɔruram sɔɔ. Domi a man yara a kasa kɔ̃ n toma. 12 Nɛn wãarun tɔ̃ru ta doonɔ nge dãa saaru, ma na dam dwiiyamɔ nge yakɔ gbebu. 13 Adama wunɛ Yinni Gusunɔ, kaa n bandu diiwa sere ka nɔrɔ. Mɛya ba ko n nun yaaye sere ka baadommaɔ. 14 Kaa sewa a Siɔni wɔnwɔndu kua, domi saa ye a yi ya tura a ka ye wɔnwɔndu kua. 15 Wunɛn sɔm kowobu ba ye kĩ sere ka yen bansɔ. Ba maa yen tua mɛɛra gãa geenu. 16 Mɛya bwesenu kpuro nu koo wunɛn yĩsiru nasia. Kpa nin sinambu kpuro bu wunɛn yiikon bɛrum ko. 17 Sanam mɛ Yinni Gusunɔ u koo wure u Siɔni bani, u koo tii sɔ̃ɔsi win yiiko sɔɔ. 18 U ra sãaron kanaru nɔ. U ku ra tu atafiiru ko. 19 A de bu yeni yore bwese te ta koo maruran sɔ̃, kpa tɔn be ba ko n wãa, bu Yinni Gusunɔ siara. 20 Domi wɔllun diya Yinni Gusunɔ u tem mɛɛra. U mɛɛrimɔ saa win wãa yee dɛɛrarun di 21 u ka yobun weeweenu nɔ u be ba gbiɔ yakia. 22 Kpa bu win yĩsiru kpara bu nùn siara Yerusalɛmuɔ 23 sanam mɛ bwesenu kpuro nu koo mɛnna ka nin sinambu bu ka nùn sã. 24 U nɛn dam dwiiyasia nɛn wãarun suunu sɔɔ. U nɛn tɔ̃ru kawa. 25 Na gerua na nɛɛ, nɛn Yinni, wunɛ wi a wãa ka baadomma, a ku man wuna sɛkum sɔɔ. 26 Toren di a tem taka kua. Wunɛn nɔma a maa ka wɔllu kua. 27 Ye kpuro ya koo doona, adama wunɛ, kaa n wãawa. Ya koo tɔkɔru ko nge yãnu. Kaa ye kɔsi nge yaberu. Mɛya ya koo maa saara. 28 Adama wunɛ, wuna mi. A ǹ tɔkɔru mɔ̀. 29 Wunɛn sɔm kowobun bibu ba ko n wãawa ben temɔ. Ben bweseru ta koo tãsi wunɛn wuswaaɔ.
