Womusu 10

1Yinni Gusunɔ, sa nɔni sɔ̃ɔre. Mban sɔ̃na a ka sun toma. Mban sɔ̃na a kukua. 2A mɛɛrio nge mɛ tɔn kɔ̃soba tii sue. Ba yãarobu nɔni sɔ̃ɔmɔ bɛrum sariru sɔɔ. Ba bu kɔkirimɔ ba suremɔ ben yina sɔɔ. 3Tɔn kɔ̃soba woo kanamɔ. Ye ben gɔ̃ru ga binɛ sãa, yera ba ra kasu. Bà n ye wa, kpa bu Gusunɔ wɔmɛ bu nùn yaakoru koosi. 4Ben tii suabu sɔɔ, ba ra nɛɛ, Gusunɔ sari, u ǹ bikiamɔ ye ba mɔ̀. 5Ye ba nia sãa, ya ra koorewa. Ba ǹ kpɛ̃ bu Gusunɔn siribu tubu. Ba ra ben yibɛrɛba yãatam siewa. 6Kpa bu tii sɔ̃ bu nɛɛ, ba ǹ wɔrumamɔ pai! Kɔ̃sa gaa kun bu deemamɔ. 7Bɔ̃ri ka weesu ka gari kɔ̃siya yi ra n yiba ben nɔsɔ. Kɔ̃sa ben yara ya ra n wuuwa. 8Wuun biruɔra ba ra n kukua. Miya ba ra n tɔmbu yɔɔru bwɛ̃ɛyɛ. Taarɛ sarirugii goo ù n yara, bu nùn sɛ̃re bu go. Dam sarirugii ù n yarima, bu nùn mwa bu go. 9Ba ra n kukuawa nge gbee sunɔ ge ga yaa mara. Bà n dam sarirugii mwa ben yina sɔɔ, kpa bu nùn gawa bu ka doona, 10kpa bu nùn sɛ̃suku bu go. Ben dam bakam mu nùn kamia. 11Ba ra tii sɔ̃wa bu nɛɛ, Gusunɔ kun ben gari mɔ̀. U ku ra mɛɛri ye ba mɔ̀. 12Yinni Gusunɔ, a seewo, a ku be ba nɔni sɔ̃ɔre duari, a bu somiɔ. 13Mban sɔ̃na kaa de tɔn kɔ̃sobu bu nun wɔmɛ bu nɛɛ, a ku ra bu sɛɛyasie. 14Yinni Gusunɔ, a ra n yɛ̃ nɔni swãa te tɔmba mɔ handunia sɔɔ. A ra bu somi. A ra maa gobekuba nɔɔri. Yen sɔ̃na ba ra nun tii wɛ̃. 15A tɔn kɔ̃son dam buo, a nùn win kɔ̃sa kɔsieyo. Kpa win nuku kɔ̃suru tu kpe mam mam. 16Yinni Gusunɔ, wuna a sãa sina boko sere ka baadommaɔ. Kaa be ba ǹ nun sãamɔ gira wunɛn tem di. 17- 18Yinni Gusunɔ, a kana nini swaa dakio. Wɔnwɔndo ù n nun kana, a nùn dam kɛ̃ɛyɔ. Be ba dam dɔremɔ, bà n nun soka, a bu wɔro. Be ba gobekuba dam dɔremɔ, a bu sirio, kpa goo u ku maa de ba n win bɛrum mɔ.

will be added

X\