Mɔnnu 9

1Bwisi yi gbere damgii nɔɔba yiru kua, yi ka yin diru banisi. 2Ma yi dera ba yɛɛ go, ba tam sɔɔru kua ba ye kpuro yi dii yerɔ. 3Ma yi yin sɔm kowo tɔn kurɔbu gɔra bu yɔ mi n gunum bo bu tɔmbu dim sokuma, 4kpa ba n mɔ̀, wi u kun bwisi mɔ, u gɛrama mini, 5u na u di yin dii yerɔ, kpa u tam nɔ mɛ yi sɔɔru kua. 6U yario laakari sariban wuurun di, kpa u wa u n wãa wãaru sɔɔ. U laakarin swaa mɔɔ. 7À n tɔn yaa kasikio gerusi, a tii gɛndu kasuawa. À n maa tɔn kɔ̃so taarɛ wɛ̃, a tii wɔmburu kasuawa. 8À n tɔn yaa kasikio gerusi, u koo nun tusi. Adama à n bwisigii gerusi, u koo nun kĩa. 9Ye a bwisigii sɔ̃ɔwa, ya ra win bwisi sosiwa. Ye a maa gemgii sɔ̃ɔsi, ya ra win yɛ̃ru sosiwa. 10À n kĩ a n bwisi mɔ, a de a gina Yinni Gusunɔ nasia. À n Gusunɔ Dɛɛro gia kaa n yɛ̃ru mɔ. 11Bwisi yi koo wunɛn wãarun tɔ̃ru sosi. 12À n kua bwisigii, wuna kaa yen are di. À n maa sãa tɔn yaa kasikio, wuna kaa yen wahala wa. 13Gari bakaru ta sãawa nge kurɔ wi u ku ra tii nɛnɛ sɛ̃ɛ, u ǹ gãanu ganu yɛ̃. 14U ra n sɔ̃wa win dii kɔnnɔwɔ wuun mi n gunum bo. 15Min diya u ra n tɔmbu sokumɔ be ba begiru doonɔ, 16u n mɔ̀, wi u ǹ laakari mɔ, u gɛrama mini. 17Gãa nɔrura ye ba gbɛna, ya nɔrubu do. Dim mɛ ba dimɔ asiri sɔɔ, mɛna mu ra n do. 18Adama yɛ̃ro kun yɛ̃ ma gɔriba wãa mi. Be u soka kpuro ba ra dewa gɔribun wãa yerɔ.

will be added

X\