Mɔnnu 8

1I swaa dakio. Bwisi yi gbãramɔ, yɛ̃ru ta nɔɔgiru sue. 2Yi yɔ̃ gungunu wɔllɔ swaa baarɔ ka swaa kɛɛnanɔ. 3Yi gbãramɔ gambon bɔkuɔ wuun duu yerɔ mi ba ra siribu ko, yi mɔ̀, 4bɛɛ tɔmbu, bɛɛya na soku, tɔn bibu kpurowa na ka mɔ̀. 5Laakari sariba, i de i n laakari mɔ. Gari bakasu, i bwisi koowo. 6I swaa dakio, kon bɛɛ gari bɛɛrɛgii sɔ̃. Ye kon gere kpuro ya sãawa dee dee. 7Domi na ku ra weesu gere, na kɔ̃sa tusa. 8Nɛn gari kpuro sãawa gem, weesu ka taki sari yi sɔɔ. 9Yi kpuro yi bururewa kpasasa bwisigiin mi. Mɛya yi maa dɛɛre wi u yɛ̃ru mɔn mi. 10I nɛn sɔ̃ɔsiru mɔɔ n kere sii geesu, kpa i maa yɛ̃ru mwa n kere wuran tii. 11Domi bwisi yi bɛɛrɛ mɔ ya kpã ya bura yãnu kpuro kere. Ye ba ra kasu kpuro sɔɔ, gãanu sari ni kaa ka yi weesina. 12Nɛ bwisi, na ra garin asansi tubu. Na yɛ̃ru mɔ n ka gãanu wunana. 13À n kĩ a Yinni Gusunɔ bɛɛrɛ wɛ̃, a de a kɔ̃sa tusi. Na tii suabu ka yɛ̃kɔ ka kɔ̃san kookoosu ka keetan gari tusa. 14Na ra tɔnu bwisi kɛ̃, kpa n nùn laakari wɛ̃. Nɛna na yɛ̃ru, nɛna maa dam. 15Nɛn saabuwa sinamba ka bandu nɛni, ma wirugiba wooda wɛ̃ɛmɔ ye ya dee dee sãa. 16Nɛn somirun saabuwa sinambu ka wirugibu ka siri kowobu kpuro ba ka tem nɛni. 17Be ba man kĩ, na maa bu kĩ. Be ba man kasu, ba koo man wa. 18Arumani ka bɛɛrɛwa na tɔnu wɛ̃ɛmɔ ka maa dukia ye ya ku ra sankire. Kon de ye tɔnu mɔ kpuro ya n da wɛ̃re. 19Nɛn are yi sii geesu ka wuran tii bɛɛrɛ kere. 20Na sĩimɔwa swɛɛ yì sɔɔ gem ka kookoo geesu wãa. 21Na be ba man kĩ arumani wɛ̃ɛmɔ ma na dukia yibiamɔ ben beru yerɔ. 22Yinni Gusunɔ u man mara u sere gãanu kpuro taka kua. 23Ba man gɔsa ba yi yellun di n tɛ ba sere handunia taka kua. 24Ba man mara ba sere nim wɔ̃ku kua, sanam mɛ nim bweru sari. 25Ba man mara ba sere guunu ka gungunu swĩi. 26Sanam mɛ, Gusunɔ kun gina tem tɛrie ka mɛn gbea. Baa tua, u ǹ mam kue. 27Saa ye u wɔllu tɛriamɔ ka nim wɔ̃kun bubenu, na wã mi. 28Sanam mɛ u guru winu doke wɔllɔ, ma nim mu kura tem di mu tɛria, na wãa mi. 29Sanam mɛ u nim wɔ̃kun nim yɔ̃ra yeru sɔ̃ɔsi u nɛɛ, mu ku tu sara, ma u tem tãsisia, 30na wãa win bɔkuɔ sa sɔmburu mɔ̀. Win nuku dobu wãa nɛ sɔɔ baadomma. Na gɔ̃ru dobu mɔ win wuswaaɔ, 31ka handunia sɔɔ. Ma na bɔri yɛndu mɔ tɔmbun suunu sɔɔ. 32Ǹ n mɛn na, nɛn bii durɔminu, i man swaa dakio. Doo nɔɔrugiba be ba nɛn swaa swĩi. 33I sɔ̃ɔsiru wuro, i ku tu atafiiru ko, kpa i bwisi ko. 34Doo nɔɔrugiiwa wi u man swaa daki, ma u ra n yɔ̃ nɛn dii kɔnnɔwɔ baadomma u n man mara. 35Domi wi u man wa, u wãaru wawa, u koo maa Yinni Gusunɔn nɔnu geu wa. 36Adama wi u man tora u tii kɔ̃sa kuawa. Be ba man tusa kpuro, gɔɔwa ba kĩ.

will be added

X\