Mɔnnu 7

1Wunɛ nɛn bii durɔbu, a nɛn gari nɛnuɔ, kpa a ku ra nɛn gere duari. 2A nɛn gere mɛm nɔɔwɔ kpa a wa a wãaru di. A nɛn sɔ̃ɔsiru laakari koowo nge mɛ tɔnu ra n win nɔni laakari sãa. 3A tu nɛnuɔ kem kem kpa a tu yore wunɛn gɔ̃ruɔ. 4A bwisi sɔ̃ɔwɔ a nɛɛ, wuna nɛn sesu, kpa a laakari soku wunɛn bɔrɔ. 5Ye yiru ye, ya koo nun gbara gabun kurɔbun min di be ba ra tɔnu fufu ko. 6Sɔ̃ɔ teeru na yam mɛɛra nɛn dirun fɛnɛntin di. 7Na gari bɔkɔ goo wa aluwaasi laakari sarirugibun suunu sɔɔ. 8U sarɔ u dɔɔ wuu suunuɔ mi kurɔ sakara kowo goo u wãa. Ma u kpa ka win yɛnun bɔkuɔ, u sĩimɔ tɛɛru sɔɔ, 9saa yoki yam bereberebun di sere n ka kua wɔ̃kuru. 10Wee, kurɔ wi, u ka nùn yinna, u kurɔ tanɔ yãnu sebua. Bwisi kɔ̃si wãa win gɔ̃ruɔ. 11U sãawa sekuru sari ka gari sunɔ. U ku ra sinɛ win yɛnuɔ. 12U ra n wãawa tɔɔwɔ, gasɔ swɛɛyɔ, gasɔ swaa kɛɛnanɔ, gasɔ maa yaburɔ. 13U nùn gaba u bɔkasi u ka nùn nɔɔ sɔ̃suna, ma u nùn gari sɔ̃ɔwa ka sekuru sariru u nɛɛ, 14u win siarabun yãkuru kua. Tɔ̃ɔ tera u ten nɔɔ mwɛɛru yibia. 15Yen sɔ̃na u yarima bu ka waana, u maa nùn wa. 16U beku buranu tɛrie win kpin yerɔ ni ba wesa ka Egibitigibun wɛ̃ɛ. 17U turare bwese bweseka nubu durorugia yɛ̃ka kpinu wɔllɔ. 18U na bu ben kĩru ko sere ka sisiru bururɔ, kpa ba n bɔkasinɛ ka nuku dobu. 19Domi win durɔ sari yɛnuɔ. U sanum da n toma. 20Gobi yi u doke bɔɔrɔ u ka da, yi kpã. Suru koo tarum ko u sere wurama. 21Ka gari dori yiya u nùn gawa, ma u nùn kamia. 22Mii mii, ma u nùn swĩi nge naa ye ba dɔɔ bu go, ǹ kun mɛ kpasa ye ya duka dɔɔ yu yina mwaara, 23ǹ kun mɛ gunɔ ge ga wɔriɔ taa sɔɔ. Ga ǹ yɛ̃ gɔɔwa ga dɔɔ, sere saa ye sɛ̃u ga gen sɔndu sɔka. 24Ǹ n mɛn na, nɛn bii durɔbu, a man swaa dakio kpa a nɛn nɔɔn gari nɔ. 25A ku de wunɛn gɔ̃ru gu gɛre kurɔ win bweserun mi. A ku ra wunɛn swaa tora a nùn swĩi. 26Domi win sɔ̃na tɔn dabinu wɔruka, mɛya u ben dabinu go. 27Win dira sãawa gɔribun wãa yerun swaa.

will be added

X\