Mɔnnu 5

1Nɛn bii, a nɛn gari bwisigii ka laakarigii swaa dakio a nɔ. 2Saa ye sɔɔra, kaa gia nge mɛ kaa ka sĩ dee dee. Wunɛn gari koo sɔ̃ɔsi ma a yɛ̃ru mɔ. 3Domi kurɔ tanɔn gari yi ra n dowa nge tim kpa yi n kokumɔ nge gum yarum. 4Adama amɛn biru, yi ra sosiewa nge gbiri kondu, kpa yi tɔnu mɛɛra ko nge takobi ye ba dɛ̃ɛra biru ka wuswaaɔ. 5Gɔɔwa win kookoosu ra ma, kpa su ka nùn da sere siki wɔruɔ. 6U ku ra swaa mwɛ ye ya koo nùn wãaru wɛ̃. U ra n torewa u kun ka baaru. 7Tɛ̃, nɛn bii, a man swaa dakio. A ku nɛn gari atafiiru ko. 8A de a ka kurɔ win bweserun swaa tonda. A ku da win dii kɔnnɔwɔ a sere nɛɛ, kaa du win dirɔ. 9Kpa a ku ra tii goo nɔmu bɛria, kpa wɔnwɔndu sarirugii u nun go. 10Saa ye, kpa tɔn tukobu bu wunɛn arumani gura, kpa bu wunɛn sɔmburun are di. 11Sanam mɛ wunɛn dam mu kpa, a gɔɔ turuku sãa, kpa a n wuri mɔ̀ nge gbeeku yaa. 12Saa ye sɔɔ, kpa a nɛɛ, mban sɔ̃na a bwisi kɛ̃ru atafiiru kua, a ǹ yi mɛm nɔɔwɛ. 13A ǹ wunɛn bwisi kɛ̃ɔbun gere wure, a ben gari atafiiru kua. 14Tɛ̃, wee, a sekuru wɔrim dɔɔ tɔmbu kpuron wuswaaɔ. 15Wunɛn kurɔ u sãawa nge bwia yèn nim mu dɛɛre. A ye tɔnan nim nɔruo. 16A ku de yen nim mu n kokumɔ swɛɛ sɔɔ ka wuun batumaba sɔɔ. 17A de mu n wãa wunɛ turon sɔ̃. A ku de gabu bu ka nun mu bɔnu ko. 18A de nuku dobu bu n wãa wunɛ ka wunɛn kurɔ gbiikoon wãasinaa sɔɔ. 19U sãawa kurɔ burɔ nge nɛm taakɔ. A de win wasi yi n da nun nuku dobu wɛ̃, kpa win kĩru ta n nun nɛni baadomma. 20Nɛn bii, mban sɔ̃na kaa n goon kurɔn binɛ mɔ. Mban sɔ̃na kaa n nuku dobu kasu goon kurɔn mi. 21A de a n yɛ̃ ma Yinni Gusunɔ u tɔnu baawuren daa mɛɛra, u baawuren sanu sanusu waamɔ. 22Tɔn kɔ̃so u ra wɔriwa win toraru sɔɔ, kpa nu nùn mwa nge yina. 23U koo kam kowa domi u kpana u tii nɛnɛ. Win wiira kookoosu su koo nùn go.

will be added

X\