1 Bɛɛ bibu, i swaa dakio kirɔ ye bɛɛn tundo u bɛɛ mɔ̀. I swaa tem kpĩiyɔ kpa i wa i bwisi ko. 2 Domi bwisi geeya na bɛɛ kɛ̃mɔ. Yen sɔ̃, i ku nɛn sɔ̃ɔsinu yina. 3 Sanam mɛ nɛn tii na sãa bii, na wãa nɛn tundon bɔkuɔ, ma na sãa nɛn mɛron bii teereru, 4 nɛn tundo u man keu kua u nɛɛ, n win gari nɛnuɔ. N win woodaba mɛm nɔɔwɔ, kpa n wa na n wãa. 5 N bwisi ka laakari nɛnuɔ, n ku win gere duari, 6 n ku bwisi yɔ̃su, yi koo man somi. N yi kĩɔ, yi koo man kɔ̃su. 7 Gãa ni kon naa gira sɔɔ, bwisiya yi kpuro kere. Ǹ n mɛn na, n yi kasuo ka ye na mɔ kpuro. 8 N bwisi kĩɔ, yi koo de n ko tɔn boko. N yi tii bɔkasio, nge kurɔ kĩnasi, yi koo de n bɛɛrɛ wa. 9 Yi ko n sãawa nge sina furɔ nɛn wirɔ. 10 Nɛn bii, a swaa dakio a nɔ ye na nun sɔ̃ɔmɔ. À n ye wura, wunɛn wãaru ta koo dakaa da. 11 Na nun sɔ̃ɔsimɔwa nge mɛ kaa ka bwisi dendi. Na nun sɔ̃ɔsimɔwa nge mɛ kaa ka gem swĩi. 12 Saa ye sɔɔ, kaa sĩwa a kun sokure. À n duka mɔ̀, gãanu kun maa nun ganumɔ wunɛn swaa sɔɔ. 13 Sɔ̃ɔsi te ba nun kua mi, a ku tu yɔ̃su. A tu nɛnuɔ kem kem, domi tera ta sãa wunɛn wãarun nuuru. 14 A ku tɔn kɔ̃sobun daa saari. A ku maa ben yira swĩi. 15 A ye derio, a ku ye swĩi. A ye duka suurio n toma. 16 Domi bà kun kɔ̃sa kue, ba ku ra dweeye. Bà kun goo torari, ba ku ra dom wa. 17 Kɔ̃san koba bu ra n sãa nge ben dĩanu ka ben tam. 18 Gemgibun kookoosu su ra n sãawa nge bururun sɔ̃ɔ yana ye ya ra n dɛɛramɔ sere sɔ̃ɔ u ka ye mam mam. 19 Adama tɔn kɔ̃sobun kookoosu su sãawa nge yam wɔ̃kuru. Ba ǹ yɛ̃ yèn sɔ̃ ba sokuramɔ. 20 Nɛn bii, a nɛn gari nɔɔwɔ. A swaa tem kpĩiyɔ a nɔ bwisi yi kon nun kɛ̃. 21 A ku yi atafiiru ko. A yi nɛnuɔ wunɛn gɔ̃run sɔɔwɔ. 22 Domi wi u yi mwa, yi koo nùn wãaru ka bwãa dobu wɛ̃. 23 A de a n tii sɛ ka bwisiku ni a mɔ̀ wunɛn tii tii sɔɔ, domi niya nu kpuro kere, niya nu wunɛn wãaru kpare. 24 A ku de weesu ka gari kankam yen gaa yu yari wunɛn nɔɔn di. 25 A de a n mɛɛra ye a naa gire. A ku wuswaa sĩiya. 26 A de a n yɛ̃ swaa ye kaa kpe, kpa a n yɛ̃ ma ya sãawa swaa gea. 27 A ku yen gam gɛra. A toraru duka suurio.
