Mɔnnu 3

1Nɛn bii, a ku nɛn sɔ̃ɔsinu duari. A nɛn woodaba nɛnuɔ. 2Yera ya koo de wunɛn wãaru tu dɛnya, kpa a n wãa bɔri yɛndu sɔɔ. 3A de a gea ko kpa a n sãa naanɛgii. A ye kpuro sebuo wĩirɔ nge wuran saba, kpa a de ya n wãa wunɛn gɔ̃ruɔ. 4Saa ye sɔɔra kaa n bɛɛrɛ mɔ Gusunɔ ka tɔmbun wuswaaɔ. 5A Gusunɔ wunɛn Yinni naanɛ koowo ka gɔ̃ru tia a kun tãsa wunɛn tiin yɛ̃ru sɔɔ. 6A de a n win bwisikunu mɔ wunɛn kookoosu kpuro sɔɔ, kpa u wunɛn swaa sɔmɛ. 7A ku tii mɛɛri bwisigii. A Yinni Gusunɔ nasio kpa a kɔ̃sa suuri. 8Yera ya koo ko wunɛn wasin bwãa dobu ka wunɛn kukunun dam. 9Ye a mɔ kpuro sɔɔ, a gbiiyo a Yinni Gusunɔ win bɔnu wɛ̃. Nge mɛya kaa ka nùn bɛɛrɛ wɛ̃. 10Sanam mɛya wunɛn biranu nu koo dĩanu yibu kpa wunɛn tam mu n kpã sere a ayeru bia mi kaa doke. 11Wunɛ nɛn bii durɔbu, a ku Yinni Gusunɔn gerusibu garisi taarɛ. A ku maa win sɛɛyasiabu mɛɛri nge toraru. 12Domi wi u kĩ, wiya u ra sɛɛyasie, nge mɛ tundo wi u win bii kĩ ka gem, u ra ko. 13Doo nɔɔrugiiwa wi u bwisi dɔba, ma u yɛ̃ru kasu u wa. 14Domi bwisi yi are mɔ n sii geesu ka wuragii kere. 15Yin bɛɛrɛ ya kpã ya bura yãnu kpuro kere. Ye ba ra kasu kpuro sɔɔ, gãanu sari ni kaa ka yi weesina. 16Bwisi yin nɔm geuɔ, hunde dakaawa ya wãa mi. Yin nɔm dwarɔ maa, arumani ka bɛɛrɛwa ya wãa mi. 17Bwisi yi koo nun alafia wɛ̃, kpa a n bɔri yɛndu mɔ wunɛn wãarun swɛɛ kpuro sɔɔ. 18Be ba yi mwa, yi bu wãaru wɛ̃ɛmɔ. Doo nɔɔrugiba be ba yi nɛni kem kem. 19Bwisiya Yinni Gusunɔ u ka handunia taka kua. Win yɛ̃ra u ka wɔllu kua. 20Win bwisi yin saabuwa nim mu ka kuramɔ tem di, ma guru winu nu demɔ gura nɛmɔ. 21Nɛn bii, a bwisi ka laakari nɛnuɔ, a ku de yen gaa yu nun kisirari. 22Ya koo nun wãa geeru ka bɛɛrɛ wɛ̃. 23Kaa kpĩ a sĩ ka toro sindu, a ǹ sokuramɔ. 24À n kpuna wɔ̃kuru, bɛrum kun nun mɔ̀. Kaa dweeyawa ka bɔri yɛndu. 25A ǹ kaa n maa ka gãanu nande ni nu koo nun deema subaru, ǹ kun mɛ tɔn kɔ̃so wi u koo nun wɔrima. 26Domi Yinni Gusunɔ u koo nun kɔ̃su. U koo nun gbara yɛ̃ri kpuron di. 27Wi n weenɛ a gea kua, à n yen dam mɔ, a ye koowo. 28Wunɛn beruse ù n nun gãanu kana ni kaa kpĩ a nùn kɛ̃ mii mii, a ku nɛɛ, u doo sere sia. 29A ku wi u nun naanɛ sãa kɔ̃sa bwisikusi. 30A ku ka goo sanna kam u kun nun kɔ̃sa kue. 31A ku tɔn kɔ̃sobun daa kĩa, a ku maa ben yira swĩi. 32Domi Yinni Gusunɔ u tɔn kɔ̃sobu tusa, adama u ra gemgibu ko win bɔrɔba. 33U ra tɔn kɔ̃sobun yɛnusu bɔ̃rusiwa, kpa u gemgibugisu domaru kua. 34Be ba ra nùn yaakoru ko, beya u ra maa yaakoru ko. Adama be ba tii kawe, beya u ra durom kue. 35Bwisigibu ba koo bɛɛrɛ wa, kpa gari bakasu su sekuru wa.

will be added

X\