1 Wi u ra gerusibu yinɛ, u koo kam kowa mam mam subaru sɔɔ. 2 Ma gemgiba dabi tem sɔɔ, tɔmba ra n nuku dobu mɔwa, adama tɔn kɔ̃so ù n tem kpare, tɔmbu kpurowa ba ra n weeweenu mɔ̀. 3 Bii wi u bwisi kasu, u ra win tundo nuku dobu wɛ̃wa. Wi u ra n kurɔ tanɔbu gasirimɔ, u win arumani sankumɔwa. 4 Sina boko wi u win tem kpare gem sɔɔ, u ra mu kuurasiewa. Adama wi u nɔm biran kɛ̃nu mwaamɔ, u ra mu kam koosiewa. 5 Wi u win beruse fufu mɔ̀, u nùn yina bɛriammɛwa. 6 Tɔn kɔ̃sobu ba ra yina mwaarewa ben tiin daa sɔɔ, adama gemgibu ba ra n nuku dobu yibawa. 7 Gemgii u ra n yɛ̃ ye n weenɛ bu sãarobu kua, adama tɔn kɔ̃so kun yen bwisi mɔ. 8 Tɔn yaa kasikiobu ba ra de wuu gu burisirawa, adama bwisigibu ba ra tɔmbun mɔru suresiewa. 9 Bwisigii ù n gari bɔkɔ siribu soka, u yɛ̃ɛwa? U mɔru kuawa? Baa ǹ n mɛren na, u ǹ bin asansi wasi. 10 Tɔn gowobu ba ku ra gemgii kã, adama gemgibu ba ra n kĩwa win wãaru tu dakaa da. 11 Gari bɔkɔ u ra win mɔru tɛriewa yande, adama bwisigii u ra tii nɛnɛwa gina. 12 Sina boko ù n da weesu swaa daki, win sina bwãabu ba koo kowa tɔn kɔ̃sobu. 13 Sãaro ka wi u ra tɔnu dam dɔre, ba gãa teenu mɔ ni nu ǹ wunanɛ. Niya, Yinni Gusunɔwa u ben baawure yam waasiamɔ. 14 Sina boko wi u ra bwɛ̃ɛbwɛ̃ɛ siri dee dee, win banda koo dakaa da. 15 Sɛna ka sɛɛyasiabu bu ra tɔnu bwisi kɛ̃, adama bii wi ba maari u tii kpare, win mɛro u koo sekuru wa. 16 Mi tɔn kɔ̃soba dabia, miya durum da kpɛ̃yɛ, adama gemgibu ba koo tɔn kɔ̃so ben kam kobu wa. 17 A wunɛn bii sɛɛyasio kpa u nun wɛ̃rasia kpa a n nuku dobu mɔ. 18 Tɔmbu bà kun Gusunɔn nɔɔ nɔɔmɔ, ba ra tii yɔ̃suwa daa bɛrɛtɛkɛ sɔɔ, adama doo nɔɔrugiba be ba Gusunɔn wooda mɛm nɔɔwammɛ. 19 N ǹ ka gari ba ra yoo sɛɛyasie, domi baa ù n nua, u ǹ yi mɛm nɔɔwammɛ. 20 Ma tɔnun gari kun asansi mɔ, a nùn garisio gari bɔkɔ. 21 Yoo wi ba ǹ ka bɔɔbɔm kue saa piiburun di, u ra n tamaa u sãawa yinnin bii. 22 Wi u mɔru mɔ, u ra sannɔsu seeyewa. Mɛya wi u ra mɔru se fuuku u ku ra toranu kpe. 23 Tii suabu bu ra tɔnu kawewa, adama wi u tii kawe, u ra bɛɛrɛ wawa. 24 Wi u ka gbɛnɔ nɔɔ tia sãa, u tii kɔ̃sa kasuammɛwa, domi u yɛ̃ ma bɔ̃ri yi wi sisie. Ka mɛ, u yinamɔ u gem gere. 25 À n tɔnun geren bɛrum mɔ, kaa n wãawa kari baka sɔɔ, adama à n Gusunɔ naanɛ sãa, u koo nun kɔ̃suwa. 26 Tɔn dabira ba ra kã ben yinni u ka bu nɔnu geu mɛɛri, adama Gusunɔwa u ra baawure wɛ̃ ye n ka nùn weenɛ. 27 Gemgibu ba ku ra wee kowobu kã. Mɛya maa tɔn kɔ̃sobu ba ku ra gemgibu kã.
