Mɔnnu 28

1Wi u kɔ̃sa mɔ̀ u ra duka suwa baa goo ù kun nùn gire. Adama wi u kun gãanu kue, u ra n tororu sɔ̃wa nge gbee sunɔ kpɛmbu. 2Tɔmbu bà n seesinamɔ tem sɔɔ, ben kparoba ba dabi, adama sina boko wi u bwisi ka laakari mɔ, win tem mu ra n wãawa bɔri yɛndu sɔɔ. 3Sina boko wi u ra tɔmbu dam dɔre u sãawa nge guru baka ye ya ra dĩanu sanku. 4Be ba Gusunɔn wooda yina, tɔn kɔ̃soba ba dam kɛ̃mɔ, adama be ba ye mɛm nɔɔwammɛ ba tɔn kɔ̃sobu yinamɔwa. 5Tɔn kɔ̃sobu ba ku ra gem swaa tubu, adama be ba ra Yinni Gusunɔ mɛm nɔɔwɛn mi, kpuro ra bu yeeriwa. 6N buram bo a n sãa sãaro kpa a n daa gea mɔ, ye kaa n ka sãa gobigii kpa a n daa kɔ̃sa mɔ. 7Wi u Gusunɔn wooda mɛm nɔɔwammɛ u sãawa bii bwisigii, adama wi u tɔn bɛrɛtɛkɛba swĩi, sekura u ra ka win tundo naawɛ. 8Wi u ra tɔmbu gobi bɔkure u nim doke too, win arumani ya koo wurawa wi u sãarobun wɔnwɔndu mɔn mi. 9Wi u yina u Gusunɔn wooda swaa daki, Gusunɔ u ra yɛ̃ro yinɛwa sere ka win kanarɔ. 10Wi u taarɛ sarirugii suremɔ swaa kɔ̃sa sɔɔ, wiya u koo wɔri yina ye u bɛri sɔɔ. Adama be ba gem swĩi, beya ba koo gea wa. 11Gobigii u ra n tamaa u bwisi mɔwa, adama sãaro bwisigii u koo kpĩ u yi tubu. 12Gemgibu bà n tem kpare, tɔmbu kpurowa ba ra bɛɛrɛ wa, adama ǹ n tɔn kɔ̃sobun na, tɔmbu kpuro ba ra duki suwa bu kuke. 13Wi u win toraru tii marisi, u ǹ kooramɔ, adama wi u te tuuba kua, ma u te deri, Gusunɔ u koo yɛ̃ro suuru kua. 14Doo nɔɔrugiiwa wi u Gusunɔ nasie baadomma. Wi u maa gɔ̃ru bɔbia u koo wahala wa. 15Sina boko wi u tɔmbu dam dɔremɔ, u sãawa nge gbee sunɔ ǹ kun mɛ nge yaa gɔba gaa. 16Wirugii wi u kun bwisi mɔ, u ra tɔmbu dam dɔrewa, adama wi u win dukia wa ka swaa gea, win banda ta ra tɛ. 17Wi u tɔnu go, win tiin sikirɔwa u duka dɔɔ. Goo u ku raa nùn yɔ̃rasia. 18Wi u daa gea mɔ, u ko n wãawa bɔri yɛndu sɔɔ, adama wi u swɛɛ kɔ̃si yiru swĩi, u koo kɔ̃ɔra yen gaa sɔɔ. 19Wi u ra gberu wuku, u ko n dĩanu yibawa, adama wi u kam naa gire, sãara ta koo nùn deema. 20Naanɛgii u koo domaru wa too, adama wi u kasu u gobi ko fuuku, u ǹ kɔ̃sa biamɔ. 21N ǹ weenɛ a tɔnu gem wɛ̃ win nɔni nasiarun sɔ̃, adama gabu ba ra ko mɛ yèn sɔ̃ ba bu dĩa dɔka kã. 22Binɛgii u ra n kĩwa u arumani wa fuuku, kpa u kun tamaa sãara koo nùn deema. 23Wi u tɔnu gerusimɔ, ba ra nùn siare amɛn biru n kere wi u ra tɔnu fufu ko. 24Wi u win tundo ka win mɛro gbɛnimɔ, ma u nɛɛ, ye ya kun toraru, wi ka swaa dio ba nɛwa. 25Wi u ra n win tiin arufaani kasu, u ra sannɔsu seeyewa, adama wi u Gusunɔ naanɛ doke u koo kuurawa. 26Wi u win tiin bwisi naanɛ sãa, u sãawa gari bɔkɔ, adama wi u laakari mɔ, u ko n wãawa bɔri yɛndu sɔɔ. 27Wi u ra sãarobu nɔɔri ka nuku tia, u ǹ gãanu biamɔ, adama wi u ka bu gɔbu, u koo bɔ̃ri wa. 28Tɔn kɔ̃sobu bà n bandu di, tɔn dabira ra kuku yeru kasuwa, adama bà n bu fuka, gemgiba ba ra bandu di.

will be added

X\