Mɔnnu 27

1A ku tororu so sian sɔ̃, domi a ǹ yɛ̃ ye tɔ̃ɔ te, ta koo nun marua. 2A ku tii siara, adama a de goo u nun siara. 3Kpenu ka yanim bunu, adama gari bɔkɔn mɔru ya bunum kere mɛ. 4Mɔru ya dam mɔ, adama wara u koo yɔ̃ra u nisinu ma. 5Gerusibu bu kĩru kere te ta ǹ sɔ̃ɔsiramɔ. 6Kpaasi wi u nun gerusi u sãawa bɔrɔkini, adama tɔnu ù n win yibɛrɛ bɔkasi u nùn nɔni wɔ̃kumɔwa. 7Wi u deba u ra mam tim dibu yinɛwa, adama wi gɔ̃ɔra mɔ̀ u ra siarewa baa ye ya sosu. 8Wi u wasam gariru yara tem tukumɔ, u sãawa nge gunɔ ge ga gen sokuru deri ga bɔsu. 9Nge mɛ turare ka gum sawaram mu ra tɔnu nuku dobu wɛ̃, nge mɛya kpaasin bwisi kɛ̃ru ta ra n do. 10A ku wunɛn bɔrɔ ka wunɛn tundon bɔrɔ biru kisi. À n wãa wahala sɔɔ, a ku somiru kaso da wunɛn dusin mi, domi wunɛn beruse u koo nun somi n kere wunɛn dusi wi u toma. 11Nɛn bii, a de a tii nɛnɛ, kpa na n nuku dobu mɔ. Baa wi u man wĩibu seewa, kpa n kpĩ n nùn wisi. 12Wi u laakari mɔ wiya u ra kɔ̃sa wa ye ya wee kpa u kuke. Wi u kun maa laakari mɔ u ra dewa u ye wɔri kpa u nɔni sɔ̃ɔra. 13Goo ù n sɔɔ goo swaa gbiiya u ka dibu sua wunɛn mi, a wi u yɛ̃ro gbiiya min yaberu tɔruba mɔɔ. 14Goo ù n win winsim tɔbura ka dam buru buru yellu, win tɔbiri bi, bu ko n sãawa nge bɔ̃ri. 15Tɔn kurɔ nɔɔ gɔmunugii u sãawa nge guru nim mɛ mu dãakumɔ mu ǹ yɔ̃ramɔ. 16Wi u kĩ u nùn yɔ̃rasia u sãawa nge wi u kasu u woo yɔ̃rasia, ǹ kun mɛ u gum yarum nɛnɛ win nɔmaɔ. 17Nge mɛ sisu su ra sisu nɔɔ dɛ̃re, nge mɛya tɔnu u ra tɔnusin daa sɔmɛ. 18Wi u dãru nɔɔri, wiya u koo ten marum di. Wi u maa win yinni nɔɔri, u koo bɛɛrɛ wa. 19Nge mɛ tɔnu ra win wuswaa wa nim sɔɔ, nge mɛya u ra win daa wa win gɔ̃ruɔ. 20Nge mɛ gɔribun wãa yera ku ra debu, nge mɛya tɔnun binɛ ku ra kpe. 21Dɔ̃ɔwa ba ra ka wura ka sii geesu sɔwe, adama tɔnun daawa ba ra ka nùn siri. 22Baa à n gari bɔkɔ doke sorɔ a suna nge dĩa bima, win gari bakara kun kpeemɔ. 23A de a n wunɛn yaa sabenun bukata yɛ̃ sãa sãa, kpa a n da nu nɔɔri, 24domi dukia ku ra n wãa tɔnun nɔmaɔ sere ka baadommaɔ. Mɛya maa bwese teeru ta ku ra n bandu dii sere ka baadommaɔ. 25A taka gɛ̃ɛyɔ gberɔ kpa a yakasu gɛ̃ guunun gãarɔ yaka kpaasu su sere kpi. 26A tii yãnu kuo ka wunɛn yãanun sansu kpa a gberu dwe ka wunɛn bonun gobi. 27Wunɛn bonun bom mu koo turi a ka wunɛn tii ka wunɛn yɛnu diisia, kpa a maa ka wunɛn sɔm kowo tɔn kurɔbu nɔɔri.

will be added

X\