Mɔnnu 26

1Bɛɛrɛ ye ba gari bɔkɔ wɛ̃ɛmɔ, ya sãawa nge gbeburu wuburun saa sɔɔ, ǹ kun mɛ gura ye ya nɛmɔ gɛ̃ɛbun saa sɔɔ. 2Nge mɛ gunɔ ga ra n yɔ̃ɔwa ga kun sinɛ gam, nge mɛya bà n tɔnu bɔ̃rusi wi u kun gãanu kue, ya ku ra nùn di. 3Sɛna ya wãawa kɛtɛkun sɔ̃. Yaruka ya maa wãawa duman sɔ̃. Ma bokura wãa gari bɔkɔn sɔ̃. 4A ku gari bɔkɔ gari wisi ka gari baka gari, kpa a ku ra ko nge wi. 5A gari bɔkɔ wisio nge mɛ win gari bakara nɛ, kpa u gia ma u ǹ bwisi mɔ. 6Wi u gari bɔkɔ ka gari gɔra, u sãawa nge wi u tii naasu bura, domi u koo wahala wa. 7Nge mɛ yɛmɔn naasu su ǹ arufaani mɔ, nge mɛya gari bɔkɔn mɔndu ta ǹ arufaani mɔ. 8Wi u gari bɔkɔ siaramɔ u sãawa nge wi u kperu bɔkumɔ kpurantɛɛru sɔɔ u sere kara. 9Gari bɔkɔ wi u mɔndu mɔ̀ u sãawa nge tam nɔro wi u sãka nɛni u fĩamɔ. 10Yinni wi u gari bɔkɔ sɔmburu sua, u sãawa nge tɛn towo wi u tɔmbu tweemɔ. 11Nge mɛ ye bɔ̃ɔ ga sia, ga ra maa wure gu ye di, nge mɛya gari bɔkɔ u ra wure u win gari baka kookoosu ko. 12À n goo wa wi u tii doke bwisigii, a n yɛ̃ ma gari bɔkɔ u nùn sanɔ kere. 13Ye yikuro u koo ka yari tɔɔwɔ, u ra nɛɛwa, gbee sunɔ ga wãa swaaɔ. 14Nge mɛ gambo ya ra n sikerenamɔ yen sɔretii sɔɔ, nge mɛya yikuro u ra n kpĩ u n tɛɛrimɔ win kpin yeru wɔllɔ. 15Baa ù n dĩanu wa ya ra n mam ka nùn sɛ̃wa u ka nu da nɔɔwɔ. 16U ra n maa tamaa u bwisigibu nɔɔba yiru bwisi kerewa be ba ra gari wisi dee dee. 17À n gari wɔri yi yi ǹ nun wa, n sãawa nge wi u bɔ̃ɔn swaa gaba sanam mɛ ga duka doonɔ. 18- 19Wi u win winsim nɔni wɔ̃kumɔ u mɔ̀, na ka nun dweebu mɔ̀wa, yɛ̃ro u sãawa nge wiiro wi u dɔ̃ɔ ka sɛ̃ɛnu ka dɔ̃ɔ kpenu kɔ̃ɔmɔ ni nu koo tɔmbu go. 20Dãa yà kun wãa dɔ̃ɔ sɔɔ, dɔ̃ɔ u ra gbiwa. Nge mɛya kɔrumɔtɔ kowo ù kun wãa sannɔ sari. 21Nge mɛ dɔ̃ɔ gɛ̃su su ra de dɔ̃ɔ yɛ̃ɛ yi n wãa, kpa dãa yu de dɔ̃ɔ u n wãa, nge mɛya nɔɔ gɔmunugii u ra sannɔ dɔ̃ɔ susi. 22Kɔrumɔtɔ kowon gari yi sãawa nge dĩa duro ni tɔmba kata mɔ̀. 23Gari dori yi yi tɔnun gɔ̃ru kɔ̃su berua, yi sãawa nge sii geesun bisu si ba mani sɔndu sɔɔ. 24Wi u tɔnu tusa u ra tii gɔsiewa win gari gerubun di u n tɔmbu nɔni wɔ̃kumɔ. 25Baa ù n gari gerumɔ ka kĩru, a ku yi wura, domi win gɔ̃ruɔ kɔ̃sa ya yiba mam mam. 26Baa ù n bwisi mɔ̀ u ka win tusiru bere, ka mɛ, win nuku kɔ̃suru ta koo sɔ̃ɔsira tɔmbun suunu sɔɔ. 27Wi u suura gbemɔ, wiya u koo ye wɔri. Wi u maa kperu bimiamɔ, wiya ta koo sɛ̃re. 28À n tɔnu weesu kua, a nùn tusawa mi. Murafitiru ta ra ka kam kobu nɛwa.

will be added

X\