1 A ku tɔn kɔ̃sobun wãaru binɛ ko. A ku kĩa a n ka bu wãa. 2 Domi ba ra kãwa ba n tɔmbu dam dɔremɔ, kpa ba n gerumɔ kɔ̃sa ye ba koo ko. 3 Lasabuwa ba ra ka yɛnu bani. Bwisiya ba ra ka ge tãsisie. 4 Yɛ̃ra ba ra ka gen dia gãa geenu ka arumani yibie. 5 Wi u bwisi ka yɛ̃ru mɔ, wiya u dam mɔ. 6 N weenɛ a lasabu ko a sere tabu da. Tɔn dabinun bwisi kɛ̃ɛ geeru ta koo de a nasara wa. 7 Gari bɔkɔ kun kpɛ̃ u bwisin asansi gia. Yen sɔ̃na u ǹ kpɛ̃ u gari gere mi ba sirimɔ. 8 Wi u ra n kɔ̃sa bwisikumɔ u koo yĩsiru yari kɔ̃san kobu sɔɔ. 9 Gari bɔkɔn bwisikunu ra n durum wuuwawa. Wi u ra maa tɔnu yaakoru ko, ba ra n nùn tusawa. 10 À n tɛmanabu kpana wahala sɔɔ, a wunɛn dam sariru sɔ̃ɔsiwa mi. 11 A kookari koowo a be ba ǹ gãanu kue wɔra be ba ka dɔɔ bu go. 12 Kaa kpĩ a weesu ko a nɛɛ, a ǹ yɛ̃ ye n koora, adama Gusunɔ u yɛ̃ ye n koora, domi u ra tɔnun gɔ̃ru wɛ̃ɛri. U mɛɛra kpuro ye a mɔ̀. U koo baawure nùn win kookoosun are wɛ̃. 13 Nɛn bii, a tim dio, domi tim mu wã, mu koo maa nun dore. 14 Nge mɛya bwisi yi ko n wã wunɛn wãaru sɔɔ. À n yi dendimɔ, kaa kpĩ a n nuku dobu mɔ. Kaa n maa yĩiyɔbu mɔ wunɛn sian sɔ̃. 15 A ku gemgiin yɛnu yina bɛria. A ku win wãa yeru wɔri a mwa. 16 Gemgii u ra wɔrumɛ kpa Gusunɔ u nùn seeya, adama tɔn kɔ̃so, nɔni swãaru ta ra nùn kamiɛwa. 17 A ku de wunɛn gɔ̃ru gu dora wunɛn yibɛrɛ ù n wɔruma, ǹ kun mɛ ù n sokura. 18 Domi Gusunɔ ù n wa mɛ, sɔrɔkudo u koo win mɔru wuna win min di. 19 A ku tii nɔwia ko kɔ̃san kowobun sɔ̃. A ku maa ye ba mɔn binɛ ko. 20 Domi kɔ̃san kowobu ba ǹ gãanu wasi sia. Ben wãara koo kpewa tumaru nge fitila ge ga gum kpa. 21 Nɛn bii, a de a Yinni Gusunɔ ka sina boko nasia. A kun wãa be ba bu seesimɔn wuurɔ. 22 Domi ba koo kam kowa subaru sɔɔ. Goo kun maa yɛ̃ sɛɛyasia bi Gusunɔ ka sina boko ba koo bu ko. 23 Wee ye bwisigiba maa gerua. Ba nɛɛ, siribun saa sɔɔ, a ku goon nɔnu mɛɛri. 24 Wi u tɔn kɔ̃so gem wɛ̃, tɔmbu ba koo nùn bɔ̃rusi, 25 adama wi u nùn sɛɛyasia u ko n wãa doo nɔɔru sɔɔ, kpa tɔmbu bu nùn domaru kua. 26 Wi u ra nun gem sɔ̃, kĩi geera u nun sɔ̃ɔsi mi. 27 A de a n gberu mɔ kpa a n yɛ̃ mɛ kaa kpĩ a tii diisia a sere yɛnu swĩi. 28 A ku wunɛn beruse seeda weesugia diiya. A ku nùn nɔni wɔ̃ke ka wunɛn gari. 29 A ku maa nɛɛ, kaa nùn kua nge mɛ u nun kua. Kaa nùn kɔsia nge mɛ win daa ya nɛ. 30 Sɔ̃ɔ teeru na sara yikuro gari bɔkɔ goon resɛm gbaarɔ. 31 Ma na deema sãki ka yaka kɔ̃susa su kpiimɔ baama, ma ten kara ye u kua ka kpenu ya wɔruka. 32 Ma na ye mɛɛra ka laakari, yera na bwisi dɔba mi. 33 Na wa à n kpuna ma a dom mɔndu kua a dweeya fiiko a kun sɔmburu kue, 34 sãaru ta koo nun deemawa nge gbɛnɔ, kpa yãaru tu nun wɔri nge swaa diobu.
