Mɔnnu 23

1Ì n sɔ̃ i dimɔ ka bukuro, a n tii sɛ ka ye a waamɔ wunɛn wuswaaɔ. 2À n sãa dim kĩro, a de a tii nɛnɛ. 3A ku win dĩa geenu binɛ ko. Sɔrɔkudo dĩa ni, nu sãawa yina. 4A ku tii nɔwia ko a ka wa a ko dukiagii. A ku mam yen bwisikunu ko. 5Gobi yi ra doonɛwa saa ye kaa nɛɛ, kaa yi mɛɛri. N da n sãawa nge yi kasa mɔ yi ka yɔ̃ɔwa nge gunɔ bakeru. 6A ku gɔburon dĩanu di. A ku maa win dĩa geenu binɛ ko. 7Domi u sãawa nge bwisiku ni nu wãa win gɔ̃ruɔ. U koo nɛɛ, a dio, a nɔruo. Adama n ǹ mɛ win gɔ̃ruɔ. 8Kaa dĩa ni sia ni a di mi, kpa gari dori yi a raa nùn sɔ̃ɔwa yi ko kam. 9A ku ka gari bɔkɔ gari ko, domi u ǹ ko n wunɛn gari gara. 10A ku wunɛn gberun kɔɔrɔ sara, kpa a ka sãaro ka gobekugia mɛnna. 11Domi wi u koo bu mɔru kɔsia u dam mɔ, u koo maa bu sanna. 12A sɔ̃ɔsiru wuro ka wunɛn gɔ̃ru kpuro te ba nun sɔ̃ɔsimɔ. A sɔ̃ɔsi te ta yɛ̃ru mɔ swaa dakio. 13A ku wunɛn bii deri a kun nùn sɛɛyasie. À n ka nùn sɛna so, u ǹ gbimɔ. 14Adama à n ka nùn sɛna sɛɛyasia, kaa win wãaru wɔra gɔribun wãa yerun di. 15Nɛn bii, wunɛn gɔ̃ru gà n bwisi kasu, nɛn tii ko na n nuku dobu mɔ. 16Ko na n nuku dobu mɔ à n da gem gere. 17A ku tɔn kɔ̃sobun wãaru binɛ ko, adama a n da Gusunɔ mɛm nɔɔwɛ. 18Saa ye sɔɔra kaa n nuku dobu mɔ sia. Wunɛn yĩiyɔbu bu ǹ maa kam mɔ̀. 19Nɛn bii, a man swaa dakio kpa a ko bwisigii. A de a n sĩimɔ swaa gea sɔɔ. 20A ku du tam nɔrobu ka yaka diobun wuuru sɔɔ, 21domi ba ra tii sãaru kpɛ̃ɛwa. Wi u maa yikuru mɔ, u koo kĩasu sebe. 22A wunɛn tundon gere swaa dakio, domi wiya u nun mara. A ku wunɛn mɛro gɛm sanam mɛ u tɔkɔ kua. 23A gem ka bwisi ka sɔ̃ɔsiru ka yɛ̃ru kasuo, kpa a ku de yen gaa yu nun doonari. 24Gemgiin tundo u ra n nuku dobu mɔwa. Wi u bwisigii mara, u ra n bɔri yɛndu mɔwa. 25A wunɛn tundo ka wunɛn mɛro nukuru dorasio. 26Nɛn bii, a man wunɛn gɔ̃ru wɛ̃ɛyɔ, a de a nɛn daa saari. 27A de a n yɛ̃ ma kurɔ tanɔ u kari mɔwa nge suura baka. Tɔnusin kurɔ u maa sãawa nge dɔkɔ kɔ̃sa. 28U ra n tɔmbu yɔɔru bwɛ̃ɛyɛ nge gbɛnɔ kpa u tɔn dabinu ko naanɛ sarirugibu. 29Wara koo hmm ko. Wara koo sɔn sɔndu ko. Wara ra n sankinamɔ kpa u n wurure. Wara ra n mɛɛra waamɔ kam. Weren nɔniya yi ra n sɔ̃ri. 30Ma n kun mɔ be ba tam sinɛ ba mu nɔrumɔ ba tam bwese bweseka mɛnnamɔ. 31A ku tam buram mɛɛri sanam mɛ mu ballimɔ nɔra sɔɔ. Mɛya mu ǹ mwɛɛbu sɛ̃, 32adama amɛn biru mu ra sibu dɔmwa nge waa dɛ̃ɛgia. 33Wunɛn nɔni ko n kankam waamɔ, kpa a n bwisiku kɔ̃sunu bwisikumɔ wunɛn gɔ̃ruɔ. 34Kaa siruku nge wi u kpĩ nim wɔ̃kun suunu sɔɔ. Kaa maa tirera nge wi u goo nimkuun beku sɔritia nɛni. 35Kaa gere a nɛɛ, ba nun so adama n ǹ nun due. Ba nun dãa kpasira, wunɛn gam kun maa nun dumɔ. Domma kaa dom se, a ka maa mu kasu a nɔ.

will be added

X\