Mɔnnu 22

1Yĩsi geera dukia baka bɛɛrɛ kere. Bɛɛrɛ ya maa sii geesu ka wura kere. 2Arumanigii ka sãaro, Yinni Gusunɔwa be yiru kpuro kua. 3Wi u laakari mɔ wiya ra gbi u kɔ̃sa wa kpa u kuke, adama laakari sarirugii u ra de u ye wɔriwa kpa u yen wahala wa. 4Tii kawabu ka Yinni Gusunɔn nasiarun are sãawa dukia ka bɛɛrɛ ka wãaru. 5Sãki ka yɛ̃ri ra n wãawa tɔn kɔ̃son swaa sɔɔ. Wi u win hunden faaba kĩ, wiya ra n ka yi tondinɛ. 6A bii swaa gea sɔ̃ɔsio. Ù n kpɛ̃a, u ǹ ye derimɔ. 7Gobigiiwa u ra n sãaro nɔma sikerenɛ. Wi u maa bɔkuramɔ u sãawa wi u nùn bɔkuramɔn yoo. 8Wi u kɔ̃sa duura, kɔ̃sa u ra gɛ̃, kpa win dam dɔrebu bu kpe. 9Nuku tiagii u koo domaru wa, domi u ra win dĩanu ka sãarobu bɔnu ko. 10A tɔn yaa kasikio giro wunɛn min di, kpa sannɔsu ka sikirinɔsu ka wɔma yu kpe. 11Wi u ra kã win gɔ̃ru ga n dɛɛre, kpa u n da gari gere ka kĩru, sina boko u koo ko win bɔrɔ. 12Yinni Gusunɔ u ra yɛ̃rugiin gere nɔni doke, adama u ra weesugiin gere sɔ̃ɔsiwa weesu. 13Yikuro u ra n mɔ̀, u ǹ yariɔ tɔɔwɔ, domi gbee sunɔ ga wãa mi, ga koo nùn go swaaɔ. 14Kurɔ tanɔn gari yi sãawa nge suura baka. Wi Yinni Gusunɔ u ka mɔru mɔ̀, wiya u koo wɔri mi. 15Bibu ba ra gari baka kookoosu kã, adama sɛɛyasiaba bu koo de bu su deri. 16Wi u sãaro dam dɔremɔ win gobi yi ka kpɛ̃a, ka wi u gobigii gãanu kɛ̃mɔ, be kpurowa ba tii sãaru kpɛ̃ɛmɔ. 17A swaa tem kpĩiyɔ kpa a bwisigibun gari nɔ. A ka gari yi na nun sɔ̃ɔmɔ sɔmburu koowo. 18A yi dokeo wunɛn gɔ̃ruɔ kpa a n sɔɔru sãa a ka yi gere. Saa ye sɔɔ, kaa n nuku dobu mɔ. 19Na kĩwa a Yinni Gusunɔ naanɛ ko. Yen sɔ̃na kon nun gari yi sɔ̃ gisɔn di mam. 20Na raa nun gari dabinu yorua yì sɔɔ bwisi ka yɛ̃ra wãa. 21Yiya yi koo nun sɔ̃ɔsi geeru sɔ̃ɔsi te kaa naanɛ ko. Bà n nun gãanu bikia, kpa a kpĩ a bu wisi dee dee. 22A ku sãaron gãanu wɔra win dam sarirun sɔ̃. A ku maa wɔnwɔndo dam dɔre siri yerɔ. 23Domi Yinni Gusunɔ u koo ka bu yina, kpa u be ba ben yãnu gura go. 24A ku ka mɔrugii bɔrɔnu ko. A ku maa ka sannɔ kĩro swĩina. 25Kaa ra win daa saari kpa a yina wɔri. 26A ku goon dibu mwa a sɔbe. A kun da n wãa be ba tɔmbu nɔɔ mwɛɛru kuammɛn wuuru sɔɔ. 27Domi à kun mɔ ye kaa kɔsia, baa wunɛn kpin yeru ba koo tɔruba mwa. 28A ku wunɛn gberun kɔɔrɔ susisia a ka googia mɛnnɛ. A ye nɛnuɔ nge mɛ wunɛn sikadoba ba nun deria. 29Wi u win sɔmburun asansi yɛ̃, u koo kpĩ u ko sinambun sɔm kowo, kpa u kun maa sãa wi u wãa bɔkuɔ.

will be added

X\