Mɔnnu 21

1Sina bokon gɔ̃ru ga sãawa nge daa tora Yinni Gusunɔn nɔma sɔɔ. U ra gu gɔsiewa mi u kĩ. 2Tɔnu u ra n tamaa win swɛɛ kpuro yi dɛɛrewa, adama Yinni Gusunɔwa u ra gɔ̃ru wɛ̃ɛri. 3Wi u sĩimɔ dee dee, win daa ya yãkuru kere Yinni Gusunɔn mi. 4Tii suabu ka tɔn biaru yera ya ra tɔn kɔ̃sobun durum sɔ̃ɔsi. 5Wi u kookari mɔ̀ u ka win sɔmburun kpunaa ko, u koo ten arufaani wa, adama wi u ra gãanu ko ka sɛndaru, gɔ̃ɔra koo nùn deema. 6Dukia ye ba waamɔ ka weesu, ya ra doonɛwa nge wiisu. Gɔɔ sɔɔra ya ra ka bu de. 7Tɔn kɔ̃sobun bɔbunu nu ra bu kam koosiewa, domi ba ǹ kĩ bu sĩ dee dee. 8Tɔn kɔ̃sobu ba ku ra swaa mwɛ ye ya dɛnde, adama be ba dɛɛre, ben swaa ya ra n dee dee sãa. 9N buram bo a n wãa wunɛ turo dii piibu sɔɔ, ye kaa n ka wãa dii bakaru sɔɔ ka kurɔ wi u sannɔsu kĩ. 10Tɔn kɔ̃so u ra n kĩwa u kɔ̃sa ko ka win gɔ̃ru kpuro. Baa win bɔrɔ u ku ra deri. 11Bà n tɔn yaa kasikio sɛɛyasiamɔ, laakari sarirugii u ra bwisi kowa. Bà n bwisigii keu mɔ̀, u ra yɛ̃ru sosiwa. 12Gusunɔ u sãawa gemgii, u ra n mɛɛrawa ye ya kooramɔ tɔn kɔ̃son yɛnuɔ, kpa u nùn kpɛ̃ɛ nɔni swãaru sɔɔ. 13Wi u yina u sãaron wuri nɔ, ba ǹ maa win tiigii nɔɔmɔ ù n somiru kanamɔ. 14Nɔm biran kɛ̃ru ta ra mɔru suresiewa. 15Gem kobu bu ra gemgii nuku dobu wɛ̃wa, adama kɔ̃sa ya ra kɔ̃san kowo kam koosie. 16Wi u gɛra laakarin swaan di, gɔriba u koo da u deema. 17Wi u dunian akande kpuro kĩ, u ku ra n gãanu mɔ. Mɛya wi u ra tam ka dĩa duronu kã, u ku ra gobi yi. 18Tɔn kɔ̃sobu ba koo nɔni swãaru wa te gemgiba kun wasi. 19N buram bo a n wãa wunɛ turo dii piibu sɔɔ, ye kaa n ka wãa dii bakaru sɔɔ ka kurɔ sannɔsugii. 20Bwisigiin yɛnuɔra dukia ra n wãa ka gãa ni nu wã, adama gari bɔkɔ u ra win dukia sankuwa. 21Wi u kasu u ko dee dee kpa u n sãa tɔn geo, win wãara koo dakaa da, kpa bu nùn gem kookoosu sɔ̃ɔsi ka bɛɛrɛ. 22Bwisigii u ra kpĩ u du tabu durɔbun wuuɔ, kpa u ben dam bua mɛ ba naanɛ sãa. 23Wi u ra win yara nɛnɛ u tii nɔni swãaru gbarammɛwa. 24Wi u tii sue u ra gãa dabinu yaa kasikiwa, kpa tii suabu bu sɔ̃ɔsira win kookoosu sɔɔ. 25Yikuron binɛ ya ra nùn gowa yèn sɔ̃ u ku ra sɔmburu ko. 26Baadomma gabu ba ra n wãawa binɛ sɔɔ, adama gemgii u ra kpuro wɛ̃wa sere u tii duari. 27Tɔn kɔ̃son yãkuru ta ku ra Gusunɔ wɛ̃re. Kaa sere gere te u ka bwisiku kɔ̃sunu mɔ̀? 28Ba ku ra weesugiin seeda dibu wure, adama wi u seeda dimɔ ye u nua ka gem, ba koo de u gari gere n ka tɛ. 29Tɔn kɔ̃so u ra n sãawa nge wi u naanɛ mɔ, adama gemgii u ra n yɛ̃ ma u gea mɔ̀. 30Tɔnun bwisi ka win laakari ka win bwisikunu, yen gaa kun kpɛ̃ yu Gusunɔn himba sĩiya. 31Tɔnu u koo kpĩ u win dumi tabu yãa geenu sebusia tabun sɔ̃, adama Yinni Gusunɔwa u ra tɔnu nasara wɛ̃.

will be added

X\