1 Tam nɔrubu bu ra tɔnu ko yaakorugii ka wurenugii. Wi u dera mu nùn go, u ǹ bwisi mɔwa. 2 Sunɔn mɔru ya sãawa nge gbee sunɔn kukiribu. Baawure wi u nùn nɔɔ kuurimɔ, u win tii dokemɔwa kari sɔɔ. 3 Wi u ku ra sannɔn batu kã, wiya ba koo bɛɛrɛ wɛ̃, adama gari bɔkɔ ga ra mɔru sewa fuuku. 4 Wi u ku ra wuku bɔmbɔmminun sɔ̃, gɛ̃ɛbun sanam u ǹ gãanu wasi. 5 Tɔnun gɔ̃run bwisikunu nu sãawa nge nim bweru te ta duku, adama wi u bwisi mɔ wiya ra n nim mɛn takam yɛ̃. 6 Tɔn dabira ta ra n ten bɔrɔkinirun gari mɔ̀, adama wara u naanɛ mɔ ka gem. 7 Gemgii u ra n sĩimɔwa daa gea sɔɔ. Win biba ko n maa sãawa doo nɔɔrugibu. 8 Sanam mɛ sina boko u sina u ka siri, yande u ra tubuwa mi kɔ̃sa wãa. 9 Wara koo kpĩ u nɛɛ, win gɔ̃ru ga dɛɛre, u ǹ durum mɔ. 10 Yinni Gusunɔ ku ra kã ba n kiaru yĩirumɔ ka kilo ka sakaku ye ya ǹ sãa dee dee. 11 Baa bii, u ra sɔ̃ɔsiwa win kookoosu sɔɔ ù n sãa daa geagii. 12 Swaa si su gari nɔɔmɔ, ka nɔni yi yi yam waamɔ, Yinni Gusunɔwa u ye kpuro kua. 13 A ku dom kĩa kpa yãaru tu ku raa nun wɔri. A de a se bururu, kpa a dĩanu wa a di a debu. 14 Wi u kiaru dwemɔ u ra tu yaa kasikiwa, adama ù n tu dwa u kpa, u ra n tii siaramɔwa. 15 Wura kun sɛ̃, wesekii geenu maa yiba, adama be ba ra gari bwisigii gere, ba ǹ dabi. 16 Goo ù n sɔɔ goo swaa gbiiya u ka dibu sua wunɛn mi, a wi u yɛ̃ro gbiiya min yaberu tɔruba mɔɔ. 17 Dĩa ni tɔnu wa ka swaa kɔ̃sa, nu ra n gina dibu dowa, adama amɛn biru, nu ra n sãawa nge yanim nɔɔwɔ. 18 Tɔnu ù n bwisi kɛ̃ɔ geo wa, ye u nia sãa ya ra koorewa. A ku tabu da bìn sɔɔru a ǹ kue. 19 Kɔrumɔtɔ kowo u ra asiri kparewa. A be ba ra gari saari too duka suurio. 20 Wi u win mɛro ǹ kun mɛ win tundo bɔ̃rusi, u koo gbiwa nge fitila. 21 Dukia ye tɔnu u wa fuuku, amɛn biru ya ku ra n domaru mɔ. 22 A ku nɛɛ, kaa kɔ̃sa kɔsia ye ba nun kua. A gesi wunɛn naanɛ dokeo Yinni Gusunɔ sɔɔ, u koo nun faaba ko. 23 Yinni Gusunɔ u ku ra kã ba n kiaru yĩirumɔ ka kilo ye ya ǹ dee dee sãa. 24 Yinni Gusunɔwa u ra tɔnun wãaru kpare. Ǹ n mɛn na, tɔnu kun kpɛ̃ u gia mi win sanu sanusu ka nùn dɔɔ. 25 Kari baka, à n Gusunɔ nɔɔ mwɛɛru kua a nɛɛ, kaa nùn yeni kɛ̃. N deema a ǹ bwisika. 26 Sunɔ bwisigii u ra tɔn kɔ̃sobu sikiewa mi ba sebi, kpa u bu sɛɛyasia u kun ben wɔnwɔndu kue. 27 Tɔnun gɔ̃ru ga sãawa ge Yinni Gusunɔ u nùn wɛ̃ gu ka win sɔɔwɔ yam bururasia. 28 Sina boko wi u naanɛ mɔ, ma u win tɔmbu kĩ, u ku ra nande. Ù n maa bu sirimɔ gem sɔɔ, win banda koo tɛ. 29 Dama mu sãa aluwaasiban bɛɛrɛ. Seri kpiki yiya yi maa sãa bukurobun bɛɛrɛ. 30 Bà n nuku kɔ̃surugii so ba mɛɛra kua, win nuku kɔ̃suru ta koo kpe, kpa u bwisi ko.
