Mɔnnu 19

1N buram bo a n sãa sãaro kpa a n sĩimɔ dee dee, ye kaa n ka sãa gari bɔkɔ kpa a n weesu mɔ̀. 2Hania yɛ̃ru sariru sɔɔ, ya ǹ arufaani mɔ. Sɛndaru ta ra ka tora dabinu nɛwa. 3Sanam mɛ tɔnu u wãa wahala sɔɔ win gari bakarun sɔ̃, Gusunɔwa u ra ka mɔru ko. 4Gobigiin bɔrɔba ba ra n dabiru sosimɔwa, adama sãaro, bɔrɔ turo wi u mɔ, u ra n mam kĩ u nùn deriwa. 5Ba koo seeda weesugian dio sɛɛyasiawa kam kam. U ǹ kisiramɔ. 6Baawure u ra n kasuwa u damgii fufu ko. Baawure u ra n maa kĩwa u n sãa wi u ra kɛ̃nu wɛ̃n bɔrɔ. 7Sãaron mɛro bisibu ba ra nùn yinɛwa. Kaa sere gere win bɔrɔba? Baa ù n kasu u ka goo gari ko, u ku ra wa. 8Wi u ra bwisiku u sere gãanu ko, win hunden alafiawa u kasu. Wi u maa bwisi kasu, doo nɔɔra yi koo ka nùn naawa. 9Ba koo seeda weesugian diobu sɛɛyasiawa kam kam, kpa ben weesu su bu kam ko. 10N ǹ weenɛ gari bɔkɔ u n wãa doo nɔɔru sɔɔ. Kaa sere gere yoo u n sinambu kpare? 11Tɔnu wi u bwisi mɔ, u ra win mɔru nɛnɛwa. U ra tora ni ba nùn kua duariwa win bɛɛrɛn sɔ̃. 12Sunɔn mɔru yà n seewa, ya ra n nanum mɔwa nge gbee sunɔn kukiribu, kpa win durom mu n arufaani mɔ nge kakoru yakasu wɔllɔ. 13Bii gari bɔkɔ u ra ka win tundo nɔni swãaru naawɛwa. Tɔn kurɔ nɔɔ gɔmunugiin sannɔsu ku ra kpe nge nim mɛ mu dãakumɔ. 14Kaa kpĩ a yɛnu ka dukia tubi di, adama Gusunɔwa u ra tɔnu kurɔ laakarigii wɛ̃. 15Yikuru ta ra tɔnu dom kpɛ̃ɛwa. Wi u ku ra maa gãanu ko, u ǹ gɔ̃ɔru biamɔ. 16Wi u Gusunɔn wooda nɛni, u win wãaru kɔ̃suwa. Wi u kun win sanu sanusu laakari sãa u koo gbiwa. 17Wi u sãaro kɛ̃ru wɛ̃ɛmɔ, Yinni Gusunɔwa u bɔkuramɔ. U koo maa yɛ̃ro nùn win nuku tian are wɛ̃. 18A wunɛn bii sɛɛyasio sanam mɛ a yɛ̃ ya koo nùn somi, adama a ku nùn so a go. 19Wi u ka mɔru gãanu sanka, u koo yen kɔsire wɛ̃wa. Wi u kun nùn kɔsire ye bikie, u nùn dam kɛ̃mɔwa u ka wure u ko. 20A bwisi swaa dakio, a de bu nun yi keu ko, kpa a ko bwisigii wunɛn wãarun tɔ̃ɔ ni nu tie sɔɔ. 21Tɔnu u ra gãa dabinu nia ko, adama Gusunɔn himba tɔnawa ya ra koore. 22Mɛ ba ra n kĩ tɔnu u n sãa, yera u n sãa naanɛgii. N buram bo a n sãa sãaro, ye kaa n ka sãa weesugii. 23Wi u Yinni Gusunɔ nasie, u ko n wãaru mɔ, kpa win wãa te, ta n deburu mɔ. U ǹ maa nɔni swãaru garu wasi. 24Gabu ba yikuru mɔ sere bà n dĩa gbɛ̃ɛru nɔma kpɛ̃ɛ, ba ku ra maa kpĩ bu ye wuna bu ka da nɔɔwɔ. 25A tɔn yaa kasikio soowo kpa gari bɔkɔ u bwisi ko. 26A bwisigii gerusio, kpa u gia ye a kĩ a nùn sɔ̃ɔsi. 27Nɛn bii, à n sɔ̃ɔsiru biru kisi, wunɛn yɛ̃ru ta koo kpe. 28Seeda weesugian dio u ra gem yaakoru kowa. Kɔ̃san kĩra ta ra n tɔn kɔ̃so nɛni. 29Tii suo u ra n wãawa sɛɛyasiabun kari sɔɔ. Gari bɔkɔ u ku ra maa soberu bie.


Copyright
Learn More

will be added

X\