Mɔnnu 18

1Wi u win tii gɔwa, win tiin arufaaniwa u kasu. U ra mɔru sewa bà n kĩ bu nùn bwisi kɛ̃. 2Gari bɔkɔ u ku ra bwisi kã, ma n kun mɔ u win gari bakaru sɔ̃ɔsi. 3Nuku kɔ̃suru ta ra ka gɛndu nɛwa, kpa bɛɛrɛ sariru tu ka sekuru na. 4Tɔnun gari yi sɛ̃wa nge daa tèn nim mu duku, adama bwisi yi sãawa nge nim mɛ mu yarimɔ saa bwian di. 5N ǹ weenɛ a yɔ̃ra toron biruɔ, kpa a gemgii nùn win gem bira. 6Gari bɔkɔn gari yi ra ka sikirinɔsu nɛwa, kpa win nɔɔ gu ka soonaa na. 7Gari bɔkɔn gariya yi ra nùn yina mwɛ, kpa yu nùn kam ko. 8Dɔmɛn gari yi sãawa nge dĩa duronu ni tɔmba kata mɔ̀ ba mwɛɛmɔ. 9Wi u ra sɔmburu atafiiru ko, ka wi u tu sankumɔ, be kpuro tia. 10Yinni Gusunɔ u sãawa nge gbãra damgiru. Gemgii ù n duka da mi, u ko n wãawa bɔri yɛndu sɔɔ. 11Gobigii u ra win dukia garisiwa nge gbãra te ta dam mɔ, domi u tamaa yiya yi nùn kɔ̃su. 12Tii suabu bu ra ka tɔnu kam kobu naawɛwa, adama tii kawabu bu ra dewa bu tɔnu bɛɛrɛ wɛ̃. 13Wi u ku ra gari swaa daki u sere wisi, ya win gari bakaru sɔ̃ɔsimɔwa. Mɛya u maa tii sekuru dokemɔwa. 14Tɔnu ù n kĩ u n wãa, ya ra nùn dam kɛ̃ win bararu sɔɔ, adama wi u kun yĩiyɔbu mɔ, wara koo kpĩ u nùn dam kɛ̃. 15Bwisigii u ra kãwa u yɛ̃ru sosi. Laakarigii u ra maa kãwa u sɔ̃ɔsiru wa. 16Kɛ̃nu nu ra tɔnu swɛɛ kuewa, kpa nu de yɛ̃ro u damgibun nɔnu geu wa. 17Siribu sɔɔ wi u gbia u gari gerua, yi ra n gina sãawa dee dee, sere win yibɛrɛ ù n maa wigii gerua. 18Tɛtɛ duma ya ra sɔ̃ɔsi wi u gem mɔ, kpa sannɔsu su kpe, kpa yu damgibu yakiana. 19À n wunɛn bɔrɔ torari, ya sɛ̃ a ka nùn susi n kere a gbãra damgiru sura. Ì n maa sanna, i ka dora, yen sɛ̃sɔ ga kpã ga kere dii te ba ka kɔkɔrɔ damgia kɛnuan dubu. 20Tɔnun geren areya u ko n ka wãa. 21Gari yi koo kpĩ yi tɔnu go. Yi koo maa kpĩ yi nùn wãaru wɛ̃. Wi u ra gari saari u koo yin are wa. 22Wi u kurɔ wa u gãa geenu wawa. Gusunɔn duroma. 23Sãaro u ra gari gerewa ka wɔnwɔndu, adama gobigii u ra gerewa ka dam. 24Bɔrɔ dabinu nu koo kpĩ nu ka tɔnu nɔni swãaru naawa, adama bɔrɔ goo u mɛro bisi kere.

will be added

X\