1 Tɔmbu ba ra gãa dabinu nia ko, adama Yinni Gusunɔwa u yen kɔkɔrɔ yɛ̃. 2 Tɔnun sanu sanusu su ra n dɛndewa win tiin nɔni sɔɔ, adama Gusunɔwa u ra nùn wɛ̃ɛri. 3 A Yinni Gusunɔ wunɛn sɔma kpuro nɔmu sɔndio, kpa ye a nia sãa kpuro yu nun koora. 4 Yinni Gusunɔ u kpuro kua win himba yu ka yibiara, sere mam ka tɔn kɔ̃sobɔ, be u koo kam koosia. 5 Yinni Gusunɔ u ku ra tii suo kã. U koo nùn sɛɛyasiawa kam kam. 6 À n mɔ̀ dee dee, ma a sãa naanɛgii, Yinni Gusunɔ u koo nun wunɛn toranu suuru kua. À n nùn nasie, kpa u nun kɔ̃sa kpuro gbara. 7 Tɔnun daa yà n Yinni Gusunɔ wɛ̃re, u ra de bu dora wi ka win yibɛrɛba mam. 8 N sanɔ a n dukia fiiko mɔ kpa ya n dɛɛre, ka sere ye kaa n ka dukia baka mɔ ka keeta. 9 Tɔnu u ra nia ko ye u kĩ, adama Gusunɔwa u ra win sanu sanusu kpare. 10 Sina boko u ra gari kowa ka Gusunɔn yiiko. Yen sɔ̃na win siribu bu ra n sãa dee dee. 11 Kilo ka yĩirutii ni nu sãa dee dee yera Yinni Gusunɔ u kĩ. Wiya u ra sɔ̃ɔsi nge mɛ ba koo ye dendisina. 12 Sina boko kun wuramɔ bu kɔ̃sa ko, domi gema mu koo de win bandu ta n tãsa. 13 Gema sina boko u ra kã. U ra kãwa bu nùn gem sɔ̃. 14 Sina bokon mɔru yà n seewa, u koo kpĩ u goo gɔɔ bɔrie, adama bwisigii u koo nùn kɔkiri u marisia. 15 Sina boko ù n nuku dobu mɔ, win tɔmbun hunde ya koo dakaa da. Ù n maa goo durom kua, ya sãawa nge gura ye ya na gbeburun saa. 16 Tɔnu ù n bwisi ka laakari mɔ, n wã n kere ù n wura ka sii geesu mɔ. 17 Gemgii u ra kɔ̃sa duka suuriwa. Wi u win sanu sanusu laakari sãa, u ra win wãaru nɔni dokewa. 18 Faari ya ra tɔmbu surewa. Tii suabu bu ra ka kam kobu nɛwa. 19 N buram bo a tii kawa kpa a n sãa bwɛ̃ɛbwɛ̃ɛ, ye kaa n ka baa mɔ tii suobun arumani sɔɔ. 20 Wi u ra bwisiku u sere gãanu ko, u ra kuurewa. Mɛya wi u maa Yinni Gusunɔ naanɛ sãa, u ra n nuku dobu mɔ. 21 Wi u ra siri ka laakari, u bwisi mɔwa. Gari yi ba gerua ka kĩru, yiya yi ra tɔmbu kamiɛ. 22 Wi u bwisi dendimɔ yi koo nùn wãaru wɛ̃, kpa bu gari bɔkɔ sɛɛyasia gen gari bakarun sɔ̃. 23 Be ba bwisi mɔ ba ra gari kowa ka laakari, kpa ben gari yi, yi tɔmbu kamia. 24 Gari dori yi sãawa nge tim gɔm mɛ mu dim do, mu ra maa wasi dam sosie. 25 Tɔnu u ra n tamaa win sanu sanusu su wãwa, adama gɔɔwa sin kɔkɔrɔ. 26 Gɔ̃ɔra ta ra de tɔnu u win sɔmburu sɔɔ hania sosi, domi u kĩ win gɔ̃ɔru tu kpe. 27 Tɔnu kam, kɔ̃sa u ra n bwisikumɔ, kpa ya n yarimɔ win nɔɔn di nge dɔ̃ɔ. 28 Tɔn kɔ̃so u ra sikirinɔsu seeyewa. Tɔn wĩɔ u ra maa bɔrɔba karanɛwa. 29 Daa bɔɔbɔyagii u ra tɔnu nɔni wɔ̃kewa, kpa u nùn sure swaa kɔ̃sa sɔɔ. 30 Wi u nɔni yinwa ma u nɔɔ tɛndu bɛri u ka kɔ̃sa ko, u ye kua kɔ. 31 Seri kpiki yi sãawa bɛɛrɛ baka, domi wi u gem swĩi, wiya u ra yi wa. 32 Wi u kpĩa u win mɔru kamia, u sãawa tabu durɔ ka gem. Wi u kpĩa u tii nɛnua, u kere tabu durɔ wi u wuu bɔkɔ kamia. 33 Sɔrobu ba ra yanim so bu ka wa ye n koo tɔnu deema, adama Yinni Gusunɔ turowa u yɛ̃ ye n koo koora sia.
